Veliaj: Edhe doktor Halimi përfitoi nga procesi i legalizimit të pallatit 5 katësh

Kandidati i majtë për Bashkinë e Tiranës, Erion Veliaj, prezantoi sot paradite programin e tij për infrastrukturën në kryeqytet, duke u fokusuar te rehabilitimi i të gjitha rrugëve të degraduara, sistemit të kanalizimeve, pajisjen me puseta të të gjitha rrugëve dhe trotuareve, si dhe krijimin e hapësirave për transportin publik dhe me biçikleta.

Duke folur për ndërtimet pa leje në Tiranë, Veliaj tha se do të anullojë dhe do të bëjë beteja ligjore për t’i shkuar deri në fund çështjes së lejeve të ndërtimit të dhëna te diga e liqenit. Madje, duke prekur çështjen e legalizimeve, Veliaj tha se edhe klinika e Dr. Halim Kosovës është legalizuar pak muaj më parë nga ALUIZNI.

“Lajmi i mirë është që edhe doktor Halimi ka përfituar nga procesi i legalizimit. Ndërtim pa leje 5 kate në Tiranë i legalizuar falë reformës tonë të legalizimeve. Imagjinoni, as partia e tyre nuk legalizonte ministrat e tyre për sa kohë që nuk paguanin haraçin aty ku duhej të paguhej. Nuk jam këtu për të bërë polemikë, por për të thënë, si mundet që dikush të kandidojë për kryetar bashkie nëse ndërton një pallat 5 kate pa leje. Shumë prej nesh, as në ëndrrën tonë më te keqe, nuk mendojmë dot që të vëmë një tullë pa leje. Unë e kuptoj disa njerëz që erdhën nga zona të vështirë të Shqipërisë, disa njerëz që erdhën nga kushte të jashtëzakonshme duhet të ndërtonin strehën e tyre diku, ku ishin afër shërbimeve, këto janë 99% e atyre që po legalizohen. Por dikush që banon në bllok dhe ndërton një pallat pesë kate pa leje, vjen dhe i thotë Tiranës më votoni për kryetar bashkie. Po ne e kemi njërin që drejton me shembull të keq. Pse na duhet një shans tjetër për një tjetër që ndërton mes shembull të keq, për një tjetër që ndërton pa leje, për një tjetër që ka kurajën të thotë që na jepni katër vite të tjera të shkatërrojmë si këto 4 vite që ikën. Ne nuk duam njerëz që ndërtojnë pa leje dhe që jetojnë në lagje të standardeve afrikane, ku ujërat e zeza komandojnë sa herë që bie shi”, deklaroi Veliaj.

Sipas tij, nëse deri dje Bashkia ishte palë me ndërtuesit, pas 21 qershorit ajo do të jetë palë me qytetarin. “U kemi premtuar qytetarëve që kjo nuk do të jetë fushatë populiste, duke folur për gjithçka dhe për asgjë. Ndaj dhe më vjen mirë që jemi fokusuar në këtë fushatë në atë që quhen problemet e tavolinës së bukës, temat që diskutohen në çdo familje. Më vjen keq që nga pala tjetër jo vetëm që nuk kemi pranim të ftesës për debat, për të folur për këto tema, por kemi riciklim të premtimeve që kanë bërë katër vitet e kaluara. Kur këto premtojnë që do të mbledhin plehrat, pse s’i mbledhin sot? Që të na bindin që kur kanë bashkinë dinë ta bëjnë këtë punë”, tha Veliaj.

Rehabilitojmë të gjitha rrugët e degraduara;

Vendosim në funksion të plotë sistemin e kanalizimeve;

Pajisim me puseta të gjitha rrugët dhe trotuaret;

Rikthejmë në shërbim të qytetarëve çdo m2 trotuar;

Krijojmë hapësira për transportin publik dhe me biçikleta;