Policia e Vlorës zbuloi dhe asgjësoi të shtunën, 200 rrënjë bime narkotike kanabis sativa.
Burime zyrtare të policisë lokale bënë të ditur për ATSH-në se, bimët narkotike u zbuluan në afërsi të fshatit Penkovë, 20 km në verilindje të Vlorës dhe ishin kultivuar në një parcelë që ndodhej në një zonë me terren të vështirë.
Bashkë me asgjësimin, policia bëri dokumentimin ligjor të këtij rasti, ndërkohë që ja përcolli dokumentacionin përkatës prokurorisë së rrethit.
Ky është rasti i parë për këtë vit, që policia e Vlorës zbulon dhe asgjëson një parcelë të mbjellë me bimë narkotike kanabis sativa.
Dy javë më parë, në mjediset e Drejtorisë së Policisë së Vlorës u zhvillua një takim ku u përcaktuan masat që do të aplikohen për të parandaluar fenomenin e kultivimit dhe të trafikimit të bimës narkotike, kanabis sativa.