Gjykata e Shkallës së Parë në Shkodër ka dënuar dje me 14 vjet e 8 muaj burg të pandehurin Ermir Gjergji, për kryerjen e veprës penale të “vrasjes me dashje”, duke dhënë gjysmën e asaj që kërkoi prokuroria në pretencë. Gjergji akuzohet se vrau gjatë një loje Zef Ejllin, vjehrrin e motrës së tij që jeton në SHBA, për shkak se bashkëshorti (kunati i tij) e dhunonte vazhdimisht dhe 29-vjeçari është hakmarrë. Gjyqi u zhvillua pa praninë e mediave dhe u kryesua nga trupa gjykuese e përbërë prej gjyqtarëve Arbër Çela, Erjon Bani dhe Aleks Nikolli. Autori i vrasjes së vjehrrit të motrës, ngjarje e ndodhur në 23 tetorin e 2013-ës në fshatin Gur i Zi, kërkoi mëshirë nga trupi gjykues, pasi ka pranuar vrasjen dhe u shpreh se është penduar për veprën e kryer. Më parë gjykata i kishte pranuar gjykimin e shkurtuar Gjergjit. Në pretencën e lexuar para trupës gjykuese, prokurori i çështjes kërkoi deklarimin fajtor të të pandehurit Ermir Gjergji, për kryerjen e veprës penale të “vrasjes me paramendim për hakmarrje” dhe “mbajtjes pa leje të armëve luftarake” dhe dënimin e tij me 35 vite burgim. Ndërsa avokati mbrojtës, Arbër Raja, kërkoi ndryshimin e cilësimit juridik të veprës penale duke marrë parasysh edhe kohën e paraburgimit.
Në fund të seancës gjyqësore, togat e zeza kanë vendosur që të deklarojnë fajtor 29-vjeçarin Gjergji, duke e dënuar me 22 vite burg, por duke qenë se gjykata ka pranuar gjykimin e shkurtuar, Gjergjit i është ulur 1/3 e dënimit, duke u dënuar vetëm me 14 vite e 8 muaj burg. Pritet që Prokuroria të vendosë nëse do e apelojë vendimin e dhënë, apo do pranojë verdiktin e Shkallës së Parë.
Zanafilla e krimit ka të bëjë me motrën e autorit, që ishte e martuar me djalin e viktimës, ndërsa çifti ndodhet në Amerikë dhe ka dy fëmijë. Sipas pretendimeve te familjes Gjergji, Albina Gjergji dhunohej nga bashkëshorti i saj, djali i viktimës. Kjo situatë ishte bërë e padurueshme për vëllanë e Albinës, ndërsa kishte kërkuar disa herë nga familja Ejlli që të zgjidhin këtë problem. Ndërsa mbrëmjen e 23 tetorit të vitit 2013, ka marrë vendimin fatal duke ekzekutuar 67- vjecarin Zef Ejlli, babanë e dhëndrit (kunatin e tij). Ngjarja ndodhi në një lokal në Gur të Zi, ku viktima u qëllua me breshëri automatiku, ndërsa më parë kishin qenë duke luajtur domino. Mësohet se Gjergji i kishte kërkuar Ejllit që të ndërhynte tek i biri që të mos e dhunonte më të motrën. Por debati ka degjeneruar deri në hakmarrje. Gjithsesi gjykata vendosi ta klasifikonte si “vrasje me dashje” dhe jo me paramendim apo për hakmarrje.