Z.deputet, kjo është vjedhje me bordero!

 E nderuar Dita! Para disa ditëve, në gazetën tonë të nderuar u informova me saktësi mbi ligjin e pensioneve për deputetët e Parlamentit tonë. Aty mësova se deputeti derdh mbi arkën e shtetit si kontribut 1 lek dhe merr 40 lekë, kur është deputet vetëm një legjislaturë dhe del në pension 55 vjeç, merr pension 500.000 lekë të vjetra. Pale pastaj deputetët e “përjetshëm”, që marrin pensione astronomike, si dhe deputeti kur nuk zgjidhet më, merr shpërblim të menjëhershëm 2-3 rroga, e kështu dhe favore të tjera. Kjo, as më shumë e as më pak, është vjedhje e arkës së shtetit me bordero.

Ata janë zgjedhur deputetë që të përfaqësojnë popullin në atë Kuvend dhe të bëjnë ligje për popullin, dhe jo për veten e tyre. Me këtë ligj që kanë bërë, ata kanë shpërdoruar detyrën dhe vazhdojnë që një grup i caktuar të vjedhin buxhetin e shtetit.

Kam mendimin që një grup deputetësh duhet të marrin nismën ligjore për ta anulluar këtë ligj. Nuk e kuptoj si është e mundur që një deputet i tillë të votojë për gjëra të tilla dhe nuk mendon për zgjedhësit e tij që nuk kanë bukë të hanë, duan të dalin në pension dhe nuk e gëzojnë dot. Si është e mundur që një deputete, para disa ditëve kur u pyet nga gazetari, mes të tjerave tha se ka shumë vende që deputetët trajtohen më mirë se tek ne? Kjo, për mendimin tim nuk ka vajtur në Parlament për të përfaqësuar popullin, por për të rregulluar hallet e saj, dhe me sa di, i ka rregulluar më së miri.

Me qëllim që në të ardhmen të mos kemi deputetë të tillë, që të mendojnë dhe veprojnë për të mbushur xhepat e tyre, duhen që në zgjedhjet e ardhshme deputetët të mos caktohen nga kryetari i partisë, por të zgjidhen direkt nga populli, se kështu ai e ndien peshën e madhe të detyrës që ka.

Unë, si qytetar i këtij vendi po shikoj se mazhoranca e re po përpiqet të hyjë në brazdë, të justifikojë votat që ka marrë, por këto përpjekje duhet të jenë më të mëdha, që të kapin kohën e humbur, për të vënë në vend shumë padrejtësi që janë bërë e vazhdojnë të bëhen. Përshëndes vendosmërinë e saj për reformën territoriale që kërkon të përfundojë në këtë sesion. Krahas kësaj duhet të punojë me vendosmëri që: 1. Brenda këtij mandati që ka, të përfundojë reformën territoriale, që Parlamenti i ardhshëm të jetë me 100 deputetë. Këtu nuk është fjala për shkurtimin e 40 karrigeve, sekretareve, shoferëve, makinave e kompjuterëve të “Gjuzefinës” që instaloi, por se janë shumë e për lumë. 2. Në zgjedhjet e ardhshme, duhet që Presidenti të zgjidhet nga populli, se kështu eliminohen allishverishet që bëhen nga partitë dhe deputetët e veçantë dhe ç’është më e rëndësishmja, rritet personaliteti i Presidentit.

Mazhorancë, populli t’i dha votat plebishitare, puno me ndershmëri, se ndryshe votimet janë afër dere dhe nuk të urojmë të përfundosh si ish-paraardhësja jote, Partia (Ç)Demokratike, që vetëm parti nuk mund të quhet. Përshëndetje nga Vasil Th.

Dërguar me postë

në redaksinë e DITA