Zbardhen konkluzionet e KE: Me rëndësi rritja e përpjekjeve në luftën kundër krimit të organizuar dhe korrupsionit

Komisioni Europian në faqen e tij zyrtare ka publikuar dhe konkluzionet e takimit të 5 të nivelit të lartë, Shqipëri-BE.

Në konkluzione theksohet se sfidat që shtrihen përpara kërkojnë përpjekje të mëdha dhe të qëndrueshme nga Shqipëria.  Si konkluzion u nënvizua se puna konstruktive në Parlament mes qeverisë dhe opozitës është thelbësore për qëndrueshmërinë e procesit të reformave drejt BE-së. Ai theksoi  rëndësinë e respektimit dhe zbatimit të qetë të marrëveshjes politike të dhjetorit që i dha  fund bojkotit parlamentar.

Komisioneri Hahn përshëndeti progresin e bërë nga Shqipëria në reformën e sistemit gjyqësor, përfshirë ngritjen e komisionit parlamentar ad hoc për reformën e gjyqësorit.

Komisioneri nënvizoi gjithashtu rëndësinë e një procesi përfshirës reformash nën drejtimin e Komisionit të Venecias. Ai theksoi se forcimi i pavarësisë, përgjegjshmërisë dhe efikasitetit të sistemit gjyqësor është thelbësor për një shtet ligjor të fortë dhe veçanërisht për luftën kundër krimit të organizuar dhe korrupsionit.

Komisioneri rikujtoi se asnjë ndryshim legjislativ nuk duhet ta minojë objektivin e ngritjes së një administrate publike të bazuar në merita dhe të depolitizuar. Shqipëria u nxit gjithashtu të vazhdojë  me miratimin në kohën e duhur të Kodit të Procedurave Administrative dhe përfundimin e Strategjisë për Reformën e Administratës Publike për periudhën 2015-2020.

Pjesëmarrësit nënvizuan rëndësinë e funksionimit si duhet dhe pavarësisë së  institucioneve demokratike kyç si parlamenti, gjyqësori dhe autoritetet gjyqësore, si dhe  institucioneve të tjera të pavarura.

Hahn përshëndeti angazhimin e qeverisë shqiptare për forcimin e mëtejshëm të luftës kundër korrupsionit dhe përfshirjes në këtë kontekst të rekomandimeve të Vlerësimit  të Kuadrit Antikorrupsion në strategjinë kundër korrupsionit dhe në planet e veprimit.

Pjesëmarrësit përshëndetën angazhimin e Shqipërisë në luftën kundër trafikut të drogës dhe shtimin e numrit të operacioneve për identifikimin dhe çrrënjosjen e kultivimit të narkotikëve. Ata nënvizuan se duhet forcuar bashkëpunimi mes institucioneve të zbatimit të ligjit për të rritur efikasitetin e hetimeve.

Kryeministri Rama shprehu shpresën se vendimi për të ecur drejt hapjes së negociatave të anëtarësimit do të bëhet përmes një procesi të besueshëm dhe të parashikueshëm, në bazë të përmbushjes së pesë përparësive kyçe.

Komisioneri nënvizoi rëndësinë e shtimit të mëtejshëm të përpjekjeve në luftën kundër krimit të organizuar dhe korrupsionit. Kjo do të nënkuptojë, mes të tjerash, masa të vendosura për eliminimin e pengesave të mbetura për kryerjen e hetimeve proaktive dhe efikase, përfshirë miratimin e ndryshimeve të synuara ad hoc të Kodit të Procedurës Penale ndër të tjera dhe përdorimin efektiv të hetimeve financiare.

Kryeministri konfirmoi angazhimin e tij për një dialog politik konstruktiv dhe të qëndrueshëm mes qeverisë dhe opozitës, çka është jetike për qëndrueshmërinë e procesit të reformave.