Zgjedhjet, mos harroni premtimet

Letër e nënshkruar

Luftar Kuka, Patos

Premtimet që u bënë gjatë fushatës elektorale nga partitë, nuk harrohen kaq lehtë nga qytetarët. Sa ishte në pushtet PD-ja, Patosi nuk mori fonde asnjëherë. Këtyre premtimeve të ekipit të PS-së, populli u besoi shumë, aq sa u dha 4000 mijë vota më shumë se ekipit tjetër të PD-së.

Tani lind pyetja: sa po realizohen këto premtime nga PS-ja në Patos? Vota nuk dha vetëm qyteti, por edhe fshatrat përreth që mbulon bashkia. Ja disa angazhime të këtij ekipi në fshatin Rerës: në stinën e verës, në fshat ka mungesa në ujin e pijshëm, burimi ekzistues po shteron, tubat janë amortizuar. Ekipi premtoi se do shponte për ujë të pijshëm këtu në Patos, kishin gjetur edhe inxhinier, projektin e kishin gati. Stina e verës erdhi, qytetarët s’po shikojnë ndonjë ndryshim. Ata do bredhin me shishe për të gjetur ujë të pijshëm. Për ujërat e zeza, ekipi u angazhua se do mbaronte me qytetin dhe më pas do hynte në fshat për sistemimin e tyre. Në fshatin Rerës janë 35 familje dhe ujërat e zeza derdhen në rrugë. Nuk ka fonde bashkia për 40-50 tuba betoni e t’i sistemojë këto ujëra të zeza? Ky ekip premtoi edhe për zgjerimin e rrugëve që çojnë në fshatra. Rrugët janë shumë të ngushta, nuk shkëmbehen dot makinat. Në fshatin Rerës, për rrugët e ngushta u vra një shofer. Ekipi u angazhua për ta zgjeruar këtë rrugë dhe se do vendoste ndriçim, pasi shtyllat janë të ngulura anës rrugës dhe nuk kërkojnë shpenzime.

Nga këto premtime, deri më tani nuk është bërë asnjë. Zgjedhjet erdhën, mos mendoni se populli i harron shpejt premtime tuaja. Është shumë e vështirë të merrni votën këtë radhë, po nuk i bëtë premtimet që i dhatë popullit. Pse, vetëm për qytetin mori fondin bashkia? Po fshatrat në periferi të kujt janë, të njerkës apo të bashkisë?!