Ministrja e Financave dhe Ekonomisë, Anila Denaj gjatë një vizite të zhvilluar në qytetin e Fierit, u ndal edhe në shkollën e mesme profesionale “Petro Soto” ku theksoi se, kemi numrin më të lartë të personave në tregun e punës që janë me moshë mesatare të re.
“Ne kemi numrin më të lartë të personave në tregun e punës që janë me moshë mesatare të re. 57% e tregut të punës në Shqipëri vjen me moshë mesatare 30- 31 vjeç. Kemi një arsim profesional falas dhe të rinjtë janë të aftë që në moshën 19 vjeç të hynë në marrëdhënie pune”, u shpreh Denaj.
Për vitin mësimor 2020-2021, në shkollën e mesme profesionale “Petro Sota” studiojnë 749 nxënës në 7 drejtime mësimore. Nga buxheti i shtetit, gjatë këtyre 5 viteve, është investuar në ndërtimin e godinës së bazës prodhuese të shkollës dhe repartet e praktikave profesionale. Gjithashtu, shkolla ka pasur investime te konsiderueshme nga projektet IPA.
52% e nxënësve nga shkolla e mesme profesionale “Petro Sota” janë punësuar vetëm një vit pas diplomimit. Mësuesit janë trajnuar me programin 24 ditor bazat e didaktikës dhe kanë marrë trajnime të vazhdueshme profesionale.
Shkolla e mesme profesionale “Petro Sota” ka rreth 128 marrëveshje me bizneset, të cilët iu mundësojnë nxënësve praktikat profesionale.
Ministrja Denaj gjithashtu zhvilloi një vizitë në Qendrën e Formimit Profesional në Fier. Gjatë një bashkëbisedimi me të rinjtë që studiojnë në këtë qendër, ministrja Denaj u shpreh se, që të marrësh një zanat është shumë mirë sepse e ke të garantuar të ardhurën mujore, jo vetëm për pasionin e një pune, por mbi të gjitha investimi që jep për ta marrë atë zanat.
“Unë vij, jo vetëm si ministrja e fushës suaj, por edhe si një individ që besoj shumë në zanat. Ne vijmë nga breza të tërë që trashëgojmë dhe zanati është pasuria më e madhe që duhet të kemi, si dhe është shumë mirë sepse e ke të garantuar të ardhurën mujore, jo vetëm për pasionin e një pune, por mbi të gjitha investimi që jep për ta marrë atë zanat”, theksoi Denaj.
Ndërsa drejtuesi i kësaj qendre, Aleksandër Lalaj, informoi se, kërkesat kryesore nga qarku i Fierit janë për autoservis elektrik, hidraulik, parukeri, kuzhinë, estetikë dhe kurse të tjera. Me këto specialitete synohet tregu i punës vendas, por edhe tregu i punës në rajon e më gjerë.
Sipas tij, në bashkëpunim me Drejtorinë Rajonale të Punësimit ka një marrëveshje bashkëpunimi me të gjitha bizneset, çka këtë vit është bërë e vështirë për shkak të pandemisë, ka bërë që një pjesë e mirë e kursantëve që mbarojnë këtu pjesën mësimore dhe pastaj të gjejnë treg pune në subjektet private.
Gjithnjë e më shumë të rinjtë po i drejtohen Qendrave të Formimit Profesional, kjo pasi një zanat i ndihmon ata t’i përshtaten kërkesave të tregut, por edhe të ruajnë trashëgiminë mes brezave. Në Fier, aktualisht po mësojnë dhe praktikojnë zanatin rreth 300 kursantë, që ndjekin 21 drejtime profesionale, kryesisht në profile si autoservis elektrik, hidraulik, parukeri, kuzhinë, estetikë, etj. Pjesa më e madhe e kursantëve që janë profilizuar pranë kësaj qendre, rreth 104 janë punësuar përgjatë vitit 2020. Janë 360 orë mësimore që këta kursantë zhvillojnë për të marrë bazat dhe njohuritë mbi zanatin që ata kanë zgjedhur.
o.j/dita