Diferencën e bën ‘shteti’ e jo satirat

Taluant Balla, është një poltikan i skalioneve të para të PS-së. Aktiv e i papërmbajtur në beteja opozitare, ai është fshikulluar rëndë në shumë forma nga ish-pushteti: në fyerje me libër shtëpie nga ana e Berishës, me kapje për zhelesh nga ana e ish-kryeparlamentares Topalli, e deri tek gjyqet ndaj tij. Si profil, kanë qenë angazhuar përgjithësisht me linjën e politikës së jashtme, ndërsa si aksion politik me goditje të përqëndruar, ka patur denoncimin e abuzimeve në dikasterin e Mbrojtjes. Nuk ka shkëlqimin e ndonjë ylli në politikë, por thonë se gëzon respekt në elektorat për angazhime të pakursyera. Dje në parlament prezantoi një sajesë satiriko-denoncuese të ish qeverisjes Berisha, ku “objektivin – gjoks” të të qëlluarit e pati te emra të familjes së ish-kryeministrit e disa ish-ministrave. Por a ja vlejnë gjetje të tilla në një situatë të re politike, sado që të prodhojnë humor?! Po të jetë për humor, n`daç në funksion thjesht të një gajasjeje e n`daç të një humori fin, plot thumba e mesazhe serioze bashkë, del e mjafton Rama.

Çdo “krijimtari” përballë atyre që lideri i tyre prodhon në seri, të çastit ose të pjekura më parë, ngjan shumë surrogato. Ajo që vlen tashmë, është çdo lloj produkti i qveritarëve të rij për të ndryshuar rrotën më gomë të çarë të historisë së mbrapshtë të këtij vendi, sidomos në pikën më të ndjeshme: tek shteti! Paaftësia për të ndërtuar shtet, na është bërë obsesion kolektiv. A mundet të shërohemi prej këtij ngërçi psikologjik?! Kjo është sfida e madhe. Shikoni me vëmendje ligjërimin e Berishës: sado që ta dërrmojë gjoksin me grushte, duke i rënë pa pushim si vetëmburrje për të mirat, që sipas tij, u ka dhuruar shqiptarëve, asnjëherë nuk i bën goja të thotë se bëri shtet. Eshtë ndër ato elementë të subkoshiencës që e tradhëton në këtë pikë. Sakaq, vetëm një pyetje ia vlen t`ju bëhet dy kahjeve: Berishës, nëse sa qeverisi në 23 vjet, bëri apo nuk bëri shtet?! Dhe atyre që kanë nisur të qeverisin, nëse sa të jenë në pushtet, do ju dhurojnë më në fund një shtet të denjë shqiptarëve, apo thjesht do e thellojnë më shumë obsesionin e të pamundurit për ta patur më në fund shtetin, në kuptimin më të plotë të kësaj fjale?!