“Punë të brendshme të partisë”, Rama flet për herë të parë për dëbimin e Dritan Lelit, tregon edhe për Xhafajn dhe Majkon: Nuk pres të më marrë populli me shkelma!

Kryeministri Edi Rama mbrëmjen e sotme ka sqaruar dëbimin e kryebashkiakut të Vlorës Dritan Leli nga Partia Socialiste, pasi refuzoi që të ishte pjesë e listës së kandidatëve për deputetë në zgjedhjet e 25 prillit.

Ai tha se Leli nuk pranoi që të përfshihej në skuadër, ndërsa lidhur me dëbimin nuk pranoi që të komentonte duke thënë se janë “punë të brendshme të partisë”.

“Nuk ka ndodhur asgjë, faktikisht unë i kam kërkuar që të përfshihet në skuadrën e Vlorës, ai ka refuzuar dhe kaq. Nuk ka pasur asnjë letër dërguar nga unë dhe lexuar nga Damiani, ka qenë një mesazh që unë kam çuar se nuk isha dot dje i pranishëm. Ishte shumë i shkurtër dhe përderisa Leli refuzoi, skuadra do të fitojë pa Dritan Lelin. 

Këtu nuk ka asnjë ndëshkim dhe nuk përbën ndonjë problem që duhet të marrim minuta për publikun, është një cështje e brendshme e jona. Kush nuk është gati për t’i dhënë skuadrës, nuk është në skuadër” tha Rama në Real Story.

Gjithashtu, i pyetur për vendosjen e Fatmir Xhafajt në listën “humbëse” të Partisë Socialiste në Qarkun e Tiranës, theksoi se partia që drejton ka një strategji të re me emra të rinj.

“Një skuadër nuk është një rreshtim i vlerave të krijuara në të shkuarën dhe deri sot. Një skuadër është një reshtim i forcave që duhen në fushë për të përballuar këtë ndeshje dhe për këtë kemi një strategji dhe skuadër të re në shumë aspekte të saj dhe kemi një qasje të re. Kjo është shumë e thjeshtë”- theksoi Rama në News 24.

Rama u ndal edhe tek Pandeli Majko i cili është renditur i 19-ti në Tiranë, duke theksuar se ai ka 30 vite në politikë.

“Pandeli Majko është i 19 sepse ai ka 30 vjet që është në vijën e parë, ose në nivelin më të lartë të PS, dhe sigurisht që Pandeli Majko, unë, Gramoz Ruci, të tjerë, nuk mund të rrimë në majë atje dhe ta shikojmë nga lart poshtë se cfarë ndodh aty ku është objektivi, kur ne duhet të jemi tek objektivi. Aty është balli i përballjes me kundërshtarin, nuk është në majë të listës.

Unë e kam shumë seriozisht kur them që neve na duhen sa më shumë njerëz, që partia t’iu ngjajë sa më shumë atyre, dhe jo njerëz që t’i ngjajnë partisë, se ndryshe partia fosilizohet dhe bëhet si ata që kemi përballë. Sali Berisha në PD ka meritat e veta, por a janë ato merita të mjaftueshme që ai të jetë akoma në listë.

Ne nuk po shkojmë përpara popullit për të bërë një panair të monumenteve, statujave, vazove, që kemi në koleksionin tonë, por për të qenë në lartësinë e këtij moment dhe të viteve që vijnë përpara. Një parti që nuk bën këtë është e dënuar për të marrë goditjen mbrapsht nga populli atëherë kur nuk ka më fuqi të ringrihet. Ne nuk kemi nevojë të presim që të na marrë populli me shkelma si një forcë që nuk arrin të ripërtërihet”, deklaroi Rama.

h.b/dita