KUSH E MENDONTE / Tre pasoja të pandemisë: Maska, Doza dhe Libra Lulesh

Koronavirusi ka sjellë në fjalorin publik, politik, civik dhe diplomatik disa përmbysje konceptesh dhe botëkuptimesh që deri vonë do konsideroheshin në mos antiligjore, të paktën turpe. Një grup pune i përbërë nga filologë, sociologë dhe kritikë letrarë të Gojëve të Liga, ka veçuar të paktën tre prej këtyre momenteve.

1.

Kush e mendonte se do vinte dita kur nuk mund të hysh dot në një bankë, pa vendosur më parë maskën? Historia moderne e “vizitave bankare” shqiptare është e mbushur me njerëz me maska që hyjnë me çantat bosh dhe dalin të ngarkuar. Janë pafund njoftimet policore që flasin për grabitës të maskuar që hynë në një bankë të nivelit të dytë, pasi neutralizuan rojen private të nivelit të tretë.

Por këtë vitin e fundit, janë pikërisht rojet private të bankave që të shqepin të dru nëse hyn në bankë pa maskë. Edhe lajmet e kronikës janë përmbysur: Policia ka gjurmuar dy persona të pamaskuar që deshën të hynin në një bankë; po punohet për zbulimin e identitetit të tyre!

2.

”Doza” nuk është më pjesë e leksikut ofendues politik, të cilën krerët dhe ish krerët e partive ja përmendin njëri-tjetrit sa herë e lyp nevoja për të nënkuptuar përdoruesin e substancave psikedelike. Një vit pas fillimit të pandemisë, qeveria krenohet se mijëra qytetarë kanë marrë dozën e parë, mijëra të tjerë kanë marrë dozën e dytë ndërsa qindra mijëra doza do mbërrijnë në aeroport javës që vjen.

Madje kryeministri shfaqet publikisht para mediave duke marrë dozën në vetë të parë.

Nga ana tjetër, opozita akuzon qeverinë se nuk ka mbajtur premtimet për të furnizuar me doza popullatën. Madje, se po përfiton financiarisht nga loja me çmimin e dozave. Akuzohen edhe furnitorë e shpërndarës ndërkombëtarë se nuk janë treguar korrektë me dozat, ndërkohë që shumë prej atyre që kanë marrë dozën, janë ankuar për marrje mendsh, duke shprehur dyshime se malli nuk ishte i mirë.

3.

Por pasoja më domethënëse e koronavirusit është se kryetari i opozitës vendosi t’u bjerë më qafë disa fletëve të bardha e të pafajshme, t’i mbushë ato me gërma, t’i ngjisë bashkë, t’u vërë dhe një kapak me fotografinë e vet pa maskë dhe ta quajë libër. Ndryshe nga maskat dhe dozat, që mund t’i gjesh dhe falas, atë duhet të blesh. E ka quajtur “Mein kampf” (nga hollandishtja, Kampi i Pionerëve në Rinas) dhe beson se me të do fitojë zgjedhjet.

Skema është pak a shumë e tillë: nëse të paktën 200 mijë votues besnikë e blejnë librin me çmim 10 dollaro, mblidhen dy milionë dollaro. Me këto, mbush me inerte një pjesë deti në Vlorë, ndërton një pallat me leje që ta prish qeveria për një dëmshpërblim 13 milionë dollaro. E pasi ke mbledhur kaq para, ç’i do zgjedhjet?

——

SHËNIM / Gojët e Liga në DITA është rubrikë satirike para-elektorale