Aktori Astrit Çerma për Bert Ndrenikën: E mban mend kur donim ti bënim ditëlindjen Demir Hyskies dhe PD na bllokonte për “ish-komunistin”, veç ti si i PD the: Do ta bëjmë për artistin e madh

Aktori i njohur Astrit Çerma i ka dalë në mbrojtje aktorit Robert Ndrenika, i cili ditët e fundit është vënë në sulme, për shkak se është përfshirë në spotin e fushatës së Partisë Socialiste.

Astrit Çerma, i ka dalë në mbrojtje, duke kujtuar kohën e largët të vitit 1997, kur ata donin të festonin 60 vjetorin e kolegut të tij, Demir Hyskies në qytetin e Elbasanit, por që atë kohë PD u kishte thënë “po festove përvjetorin  e ish komunistit, e ish deputetit, ne, demokratët nuk ta falim..Festoje po..gjej brimë e futu masanej”.

“Çuditërisht, ata soj njerzish që u rënë dhembet para e pas “demokracisë” duke sharë kan mbetur po ato, por, tani kan vënë proteza. Proteza nga më të shtrenjtat e më të ndyrat me të cilat shajn, kërcënojn, kafshojn..Punë e madhe,” shkruan aktori ndër të tjera.

Postimi i plotë i aktorit:

I dashur Berti….

Të kujtohet 60 vjetori i Demirit.

U mblodhëm të gjithë, ti, Kadriu, Luftari, Vangjushi, shokë dhe kolegë..

Ishin ditët e para të muajit të parë të atij viti ogurzi.1997

Në atë kohë, me tu marr vesh se Teatri Skampa do të festoi ditlindien e Artistit të Popullit Demir Hyskia, militant të partisë e të pushtetit të asai kohe u sulën të tërbuar me shantazhe e kërcënime.

Nuk mund ta harroi dhe nuk mund të rri pa e përmendur një profesor tek “Aleksandër Xhuvani”, që, “para 90-tës” gjysma e dhëmbeve i kishte rënë duke sharë imperializmin, revizionizmin, Niçen e Dostojevskin, dhe pas 92, gjysma po i binte duke mallkuar e anatemuar, komunizmin, socializmin, Marksin e Kadaren. Më erdhi në zyrë si i tërbuar dhe duke shkumbëzuar më “këshilloi”:

“Po festove pervjetorin  e ish komunistit, e ish deputetit, ne, demokratët nuk ta falim..Festoje po..gjej brimë e futu masanej”..

“Do ta festojm, ja preva. Do ta festojm sepse do të festojmë ditlindien e njeriut dhe artistit të nderuar të Elbasanit e të Shqipërisë.”..

Për ndonjë fond shtesë as nuk u bë fjalë fare. Nga ministria e nga bashkia, na erdhën vetëm dy shkresa me dy fjalë edhe një apostrof: “S’kemi fonde..”..

Problemin e zgjithëm me ndihmën e shitsave dhe tregëtarëve Elbasanas, që na dhuruan pa hezitim para edhe dhurata të ndryshme për Demirin, por, ajo që na u dhimbë për atë festim dhe na vuri në “siklet” ishte përgjigja e Ministrit Teodor Laço dhe K.Bashkisë Elbasan Engjëll Daklit..

I pari më mori në telefon dhe më sqaroi me shumë “falje” se nuk mund të merrte pjesë, sepse “ishte i ftuar në një ekspozitë”, ndërsa i dyti na solli një shkresë ku shënohej:” Të shtunën, ora 10, kam pritie populli”…

Fill pas këtyre, edhe kryetari P.D së qytetit na sjell një “kërkesë” për sallën e teatrit për një farë “konference” që do të bënte në shkallë rrethi me antarët e partisë së tij pikërishtë ditën shtunë në orën 10…

Ne, organizatorëve të ditlindies, na krijua një far bindie se ishim rrethuar kaq keq nga pushteti “blu”, sa, hothëm dhe mendimin që të mos ftonim asnjeri, por ta festonim brend për brenda teatrit.

Sidomos, për ty Berti, nuk ta kam thënë më vonë sepse më vinte zor, por, po ta them tani, ngula këmbë unë:.

“Berti ka qenë deputet i P.D kështu që…Siç po i shohim hesapet e kësai kohe, kam frikë se do ta fusim “në siklet” si këta të tjerët. Bëjmë sikur e kemi harruar ta lajmërojmë, edhe..”…

Më kundërshtoi me të madhe Et’hem Lulja: “Berti është Berti. Është shoku i jonë më tha. Ai është artist i madh por është edhe njeri i madh…

“Edhe Ministri shkrimtar i madh është, ja ktheva, edhe kryetari bashkisë inxhinjer i madh, edhe kryetari i partisë, edhe për njerës të mëdhenjë i njohim, por…A e kuptoni o shokë se po të mos pranoi dhe Berti se sa e rëndë do të jetë kjo për Demirin?!..”….

E mban mend?. Ne vendosëm të vimë edhe erdhëm dhe të takuam në Tiranë.

U gëzove pa masë dhe na qetsove pa masë: “Do ta festojmë ditlindien e Demirit. Të shokut e kolegut tonë. Aq mirë do ta festojm sa…

Dhe e festuam..

Të shtunën erdhët të gjithë, Kadriu, Luftari, Vangjushi.

U harrua “ftesa e ekspozitës” dhe së bashku me ju erdhi edhe Ministri, Teodori me kujtimet e tia të mrekullueshme. Sapo e mori vesh kryetari i Bashkisë Engjëlli ardhjen tuaj” e shtyu pritien e popullit”, mori me vete humorin e tij dhe erdhi..

Salla u mbush plot me kolegë, shokë, elbasanas…

Kan kaluar 24 vjet që at’herë…

Çuditërisht, ata soj njerzish që u rënë dhembet para e pas “demokracisë” duke sharë kan mbetur po ato, por, tani kan vënë proteza. Proteza nga më të shtrenjtat e më të ndyrat me të cilat shajn, kërcënojn, kafshojn..Punë e madhe..

Edhe ne mbetëm po ata…

Të kujtohet një batutë që ta thoshte kolegia, shkodrania, Vjollca me dukej quhej, tek komedia “Udha e Zavalinajve” e Thanas Borodanit:

– Luj more prej vendit..

– Luj ti- i përgjigjeshe. Ti luj. Se unë jam mirë e shumë mirë këtu ku jam…

Ndaj i dashur miku jonë, të uroj një gjumë të qetë për prehjen tënde. Një mëngjes të lehtë për të dashurit që të rrethojn. Një kafe të ëmbël për shokët e kolegët që të presin. Një shëtitje shlodhëse, për njerzit që të përshëndesin. Dhe një rrol të ri për skenën dhe ekranin që aq shumë i ke nderuar…

Astrit Çerma.