Bllokohen kreditë e buta, Bozdo: Ka prapavijë politike

Enti Kombëtar i Banesave u ka kërkuar të gjitha bashkive të vendit bllokimin e dhënies së kredisë së butë për të pastrehët.  Shkak për këtë janë bërë disa abuzime të konstatuara në këtë projekt.

Drejtoresha e Entit të Banesave, Doris Andoni, në një intervistë për “Panoramën” thotë se të gjithë përfituesit e kredisë së butë do të kalojnë në sitën e verifikimit. Ato familje, dosja e të cilave do të rezultojë me shkelje do të duhet të kthejnë mbrapsht subvencionin që kanë përfituar dhe të paguajnë kredinë me normat e interesit të tregut.  Sipas Doris Andonit, pezullimi i projektit të subvencionimit të interesave të kredisë do të zgjasë për një periudhë njëvjeçare. Gjatë kësaj kohe, grupet e punës që do të ngrihen nga Ministria e Zhvillimit Urban dhe Turizmit në bashkëpunim me Entin Kombëtar të Banesave do të verifikojnë të gjitha kontratat e lidhura.

Ndërkohë, po sot, lidhur me këtë fakt ka reaguar Bashkia e Tiranës, nëpërmjet nënkryetarit të saj, Enno Bozdo. Sipas tij, vendimi i qeverisë për të bllokuar këto kredi ka prapavijë politike.

“Dua t’ju informoj se që prej 2009, qeveria ka akorduar një kuotë të caktuar në dispozicion të njësive vendore, për të mundësuar kredi të buta për strehimin e familjeve në nevojë apo të reja. Që prej nisjes së këtij procesi, në vitin 2009 e deri tani janë miratuar nga Këshilli Bashkiak i Tiranës 2045 kredi dhe për këtë është informuar Enti Kombëtar i Banesave, pas çdo miratimi në Këshillin Bashkiak, por prej tyre janë lidhur vetëm 610 kontrata me bankën përkatëse. Informacionin për kontratat e lidhura me bankën e disponon në mënyrë zyrtare dhe periodike Enti Kombëtar i Banesave, nëpërmjet të cilit informohet edhe Bashkia e Tiranës. Pra, efektet financiare të buxhetit të shtetit janë vetëm për 610 kontrata. Çdo aludim tjetër është i pavërtetë dhe një justifikim amatoresk për të bllokuar këtë proces.

Dua gjithashtu t`ju bëj të ditur se aktualisht, vetëm në Bashkinë e Tiranës janë 872 familje që kanë aplikuar për kredi të butë. Një pjesë e dosjeve të plotësuar prej tyre presin miratim në Këshillin Bashkiak dhe pjesa tjetër është në proces shqyrtimi, në bazë të kritereve të përcaktuara qartë në VKM.

Në vend që qeveria të shtonte kuotat, për të përballuar kërkesat e mëdha që ka qyteti i Tiranës për strehim, kryeministri vendos pezullimin e këtij procesi, në një afat të pacaktuar”, tha Bozdo.