Tokat bujqësore, shtyhet afati i pronësisë

Procesi i dhënies së titujve të pronësisë për tokat bujqësore do të përfundojë në mesin e vitit 2016. Vendimi është botuar tashmë në Fletoren Zyrtare, çka legjitimon nisjen e procesit të verifikimit të titujve të pronësisë për tokat e ndara sipas ligjit 7501. Ky proces duhej të kishte përfunduar në fund të vitit 2013, por për shkak të mosavancimit të procesit, ekzekutivi u detyrua të propozojë në Kuvend shtyrjen e afatit. Gjatë debateve në komisionet kuvendore, palët ranë dakord që afati i procesit të shtyhej deri me 31 Dhjetor të vitit 2015, por ndryshe nga sa miratoi Kuvendi, afati i ri ligjor do të jetë 30 qershori i vitit 2016. Me këtë shtyrje prej 2 vitesh e gjysëm, qeveria duket se i ka paraprirë ngadalësimit të procesit që mund të vijë jo vetëm nga proceset gjyqësore, por edhe nga procesi i zgjedhjeve vendore të vitit 2015. Edhe pse kanë përfituar tokë bujqësore në vitin 1991, me mijëra fermerë shqiptarë nuk zotërojnë certifikatën e pronësisë, por vetëm atë të përdorimit. Mungesa e titujve të pronësisë për tokat bujqësore cilësohet si një ndër faktorët kryesor pengues për zhvillimin e sektorit të bujqësisë në vend.