Mediat belge: Deputeti Mark Frroku, i dënuar për vrasje në Belgjikë

Sipas agjencisë së lajmeve, “Sudinfo.be”, rasti lidhet me botën e prostitucionit ku veprojnë disa rrjete emigrantësh shqiptarë në Bruksel. Viktima, Aleksandër Kurti, me sa duket kishte ‘shkelur’ mbi aktivitetet e anëtarëve të tjerë, bosë ose anëtarë të rrjeteve të imigracionit klandestin drejt Anglisë. Pasditen e 5 marsit 1999, ai u gjend duke dhënë shpirt, pas disa goditjeve me thikë, në rrugën ‘Fonsny’, në një stacion treni. Pas disa denoncimeve anonime, 4 shqiptarë u identifikuan si fajtorë, ndër të cilët Besnik Morina (alias Mark Frroku), 41 vjeç dhe Ajan Bytyçi, 36 vjeç, që u klasifikuan si bashkëpunëtorë.

Ata u ndalën shumë kohë më vonë, por ata dolën nga qelitë shumë përpara sesa të fiksohej data e gjyqit të Brukselit, në janar të 2010-s. Që të 4 u shpallën fajtorë në përfundim të procesit dhe u dënuan me nga 10 vjet heqje lirie, në mungesë, meqë qenë lënë të lirë më herët e prej atij çasti, s’u paraqitën asnjëherë para togave të zeza.

Por pas rekursit të Prokurorit të Përgjithshëm, ka pasur një shfuqizim të masës së dënimit të 24 marsit 2010 dhe Frroku dhe Bytyçi duhet të rigjykohen. Rasti është planifikuar të nisë në Gjykatën Penale e Nivelles, më 10 shkurt. “Por të dy ende mungojnë në Belgjikë dhe jetojnë të lirë në vendin e tyre të origjinës, Shqipëri”, shkruan media belge. “Dhe sidomos Mark Frroku, i cili ka filluar që nga një karrierë politike që çoi atë për t’u zgjedhur më 23 qershor si deputet në parlamentin shqiptar”, shkruan “Sudinfo.be”. Deputeti dhe kreu i Partisë Kristian Demokrate, PKD-së është në koalicion me PS-në, pas zgjedhjeve të 23 qershorit. Me gjithë këtë nga autoritetet shqiptare të drejtësisë nuk bëhet e ditur nëse ka pasur apo jo kërkesë për ekstradimin e Frrokut, para se ai të përfshihej në politikë.

“Që prej këtij momenti, shtrohet pyetja nëse Frroku gëzon apo jo imunitet parlamentar? Sigurisht jo në Belgjikë, ku teorikisht ai mund t’i nënshtrohet gjykimit, meqë faktet, fajësimi dhe rikthimi i procesit në gjykatë kanë ndodhur para zgjedhjes së tij deputet. Asgjë s’na pengon, na thotë një eksponent i jurisprudencës. Po Shqipëria, do ta ekstradonte gjithsesi njërin prej deputetëve të saj? Asgjë s’është më e sigurt. Gjembi juridiko-diplomatik tashmë është mbjellë”, mbyllet shkrimi në faqen informative. Ndërsa “Nord Eclair.be”, e ka raportuar lajmin me titullin “Në Bruksel i akuzuar, në Shqipëri deputet”. Vëllai i deputetit, biznesmeni Arben Frroku, është i arrestuar prej një viti për vrasjen e kryekomisar Dritan Lamajt në Tiranë, pas një konflikti me të dhe u kap një ditë pas krimit në Selanik të Greqisë, nga ku dhe u ekstradua.

***

Reagon Frroku: Lajm i nxitur politikisht, jam qytetar i lirë shqiptar dhe amerikan

Deputeti Mark Frroku ka reaguar në “Neës24”, pas publikimit të lajmit në mediat belge, sipas të cilave ai rezulton i dënuar vrasjen e një shqiptari në Belgjikë, në vitin 1999. Deputeti Frroku e cilësoi lajmin si të nxitur politikisht, duke garantuar se nuk ka asnjë problem me drejtësinë në asnjë vend të botës.
“Ky është një lajm i pavërtetë dhe i nxitur politikisht. Nuk kam asnjë dënim penal në asnjë vend të botës. Garantoj se nuk kam asnjë problem me drejtësinë. Garantoj si qytetar shqiptar dhe amerikan. Drejtësia belge s’ka asnjë akuzë ndaj meje. Media t’i referohet institucioneve zyrtare belge”, deklaroi Mark Frroku.