Shprehja më e përdorur në dosjen e Mziut: S’don Xhelali

Prokuroria e Tiranës çoi dje në gjykatë dosjen për tre zyrtarët e lartë të Bashkisë Kamëz, Xhelal Mziu, kryebashkiak, Atli Hoti, drejtor juridik dhe Bujar Loshi, drejtori i Tatim-Taksave. Në kërkesën për gjykim përfshihen të gjitha shkeljet e funksionarëve, deri tek shprehja tribu; “Nuk don Xhelal Mziu!”. Akuzat janë “shpërdorim i detyrës”, e kryer në bashkëpunim. Por bie në sy fakti se tashmë Mziu do të akuzohet jo vetëm për tenderin 80 milionë lekë të rrugës Valias i Ri-Laknas që ia hoqi pa të drejtë firmës fituese “Gjoka”, por edhe për bllokimin e llogarive bankare dhe ndëshkimin me taksa në mënyrë të paligjshme. “Mbi Mziun akuza rëndon dy herë, pasi gjatë ushtrimit të detyrës ka dëmtuar interesat ekonomike të dy kompanive private dhe ka shkelur legjislacionin mbi prokurimet publike në dëm të interesave publike dhe të shoqërive të përfshira në procedura tenderuese për ndërtim rrugës në njësinë administrative që drejton”, tha Prokuroria. Janë hetuar për pesë muaj me radhë katër kallëzime penale dhe dosja është voluminoze.

Dosja I

Ka mbifaturuar kompanitë private me gjoba e tatime në mënyrë të paligjshme. Firmat “Gjoka” dhe “A…sh.p.k”, në pesë vitet e fundit, 2008-2013 kanë ankimuar detyrimet e vendosura nga Bashkia Kamëz, por është rrëzuar. Ndaj i janë drejtuar Gjykatës. “Për 5 vite, si pasojë e ‘kokëfortësisë’ së Bashkisë Kamëz, është investuar Gjykata e Tiranës dhe Apelit që i dhanë të drejtë firmave, por sërish bashkia nuk i ka përfillur, duke bllokuar edhe llogaritë bankare të dy firmave”, thuhet në dosjen e prokurorisë. Edhe për këtë fakt kompanitë kanë hapur procese gjyqësore me vete, që i kanë fituar. Bëhet fjalë për taksat e “ndërtesës” dhe të “hapësirës”, kurse paratë nuk u janë kthyer më pas. Kompanitë paguajnë 1,4 milionë lekë detyrime, por me vendim gjykate duhej rivlerësim. Përmbarimi e kërkon këtë tek Mziu në 2010, por ky i fundit sërish tregohet “kokëfortë”. Ndërsa për taksën e shfrytëzimit të hapësirës taksa ka qenë mbi 5 milionë lekë në 2009. Firmat fitojnë përsëri në gjykatë me formë të prerë. Por në përgjigje, kohët e fundit vijnë bllokimet e llogarive bankare më 15 shkurt 2012. Përmbarimi ndërhyn në Banka dhe llogaritë zhbllokohen. “Por bashkia nuk ndal revanshin dhe i ribllokon më 10 dhjetor 2012”, thuhet në dosjen hetimore.

Dosja II

Dosja e dytë është ajo e tenderit të rrugës Valias i Ri-Laknas, me vlerë 80 milionë lekë, ku fituesit i hiqet e drejta e tenderit dhe i kalon një tjetër kompanie që bën punime. AKP i dha të drejtë firmës “Gjoka” në ankimimin e kryer, por kryebashkiaku Xhelal Mziu refuzoi vazhdimisht. Për këtë shkak kompania e kallëzon në prokurori dhe faktohet se tenderi i ishte dhënë një tjetër kompanie, “Everest” në mënyrë të paligjshme. Xhelal Mziu arrestohet për shpërdorim detyre dhe mbahet 24 ditë në qeli, por Gjykata e Apelit e liron me masën “detyrim paraqitje” në fillim të muajit janar.