SHËNIM: Ca lutje PD-së….

Në betejën e saj opozitare, PD është sulur në disa fronte. Por ajo që mbetet e mangët kur ngre akuza, është mungesa e konkretësisë. Janë rreth 20 fjalë gjithsej dhe afro 5 fraza standarte kur artikulon ndonjë akuzë, më shumë se rutinore, krejt parazite, të payndyrshme dhe të mërzitshme. Akuzon për largim nga administrata të nëpunësve të specializuar, por nuk jep një emër konkret, nuk sjell një shembull ilustrativ, siç PS-ja vitet e para të opozitës, që denoncoi rastin e largimi të Ditmir Bushatit (asokohe i paangazhuar politikisht), nga MPJ-ja, duke bërë publik dhe formimin e tij në diplomaci. Deputeti i saj, Berisha, ka akuzuar së fundi kryeministrin Rama, për kërcënim me jetë ndaj një gjykatësi, por nuk ka as emër e as ndonjë provë, siç shumë e shumë të tjera.

Janë po ashtu një sërë akuzash, për çështje të cilat mund të gjykohen vetëm pas dy a më shumë vitesh. Edhe për situatën e sigurisë, nuk mund të ngrihen akuza a thua se para 23 qershori, nuk ishte e nevojshme as të mbyllje dyqanin me çelës, se nuk guxonte kush të të vidhte. Kjo opozitë duhej të nis të mendojë se si të ketë respekt për veten, se si të nis të formësohet për mbarë e të mos ngjajë në paaftësi e idiotsira me periudhën kur ishte në pushtet. Ligjërim i saj, që në fakt është i vetë Berishës, i ngjan atij të viteve `90, dhe nuk merr fare në konsideratë kontekstet e reja politike e sociale, në të cilat shqiptarët gjykojnë si një qeverisje e si një opozitë.

Pas 23 vitesh, ende hartojnë fjali me fjalën “liri”, (shtëpia e lirisë e quajti Basha PD-në!), duke e vërtitur kot më kot, pa asnjë pikë kuptimi, dhe pa u marrë vesh se ç`duan të thonë. Janë bërë si ata veteranët që u ka mbetur ora në 44-ën, pavarsisht se ku e katandisi komunizmi e ku ndodhet aktualisht Shqipëria.  E.H.