Në tabelë të zemrës sime…
M’u në tabelë të zemrës sime
Desha të gdhendja emrin tënd
Po në tabelë të kësaj zemre
Nuk kishte mbetur asnjë vend.
Siç fshin agimi hije netësh
Dhe unë e fshiva krejt tabelën
Më ndriti zemra si pasqyra
As shenjë, as gjurmë aty nuk ngelën.
Siç fshin agimi hije netësh
Dhe derdh e derdh mbi botë argjend
Dhe unë i fshiva gjithë emrat
Të hapja vend për emrin tënd.
Sot në tabelë të zemrës sime
S’ka asnjë germë nga koha e vjetër
Por ndrit si yll me vezullime
Veç emri yt dhe asnjë tjetër.
Pa titull
Ne jemi pranë e pranë
Porsi dy sytë
Ti Toka je-planet
Unë- satelit.
Një mrekulli si ty
S’ka lindur nëna
Rreth teje rrotullohem
Porsi hëna.
Rreth teje rrotullohem
Nëpër mjegull
Njëlloj si Toka-Hënën
Më mban pezull.
Këngë pleqërie
Eja, more, eja
Se na ra rrufeja
Nga vashat e reja;
M’u në kokë na ra.
Eja, se u plakëm
Eja, se u mpakëm
S’e durojmë dot flakën
Që në kokë na ra.
Na iku takati
S’na ndihmon më fati
Fati as inati
E kaluam radhën.
Më s’na mbajnë këmbët
Na kanë rënë pendët
Pendët dhe dhëmbët
S’e hamë dot dardhën.
Nga ne hiqu dreq
Ik se jemi pleq
Keq edhe më keq
Jeta jonë u shemb.
Ik, o, ditëzezë
Ik se nuk na ndez
Jemi për varrezë
Ndaj nuk shesim mend.
PS: këto vargje janë muzikuar nga Kujtim Prodani. Botohen si një homazh për të.