“Apartamentin e kam amanet nga vjehrri, llogaritë bankare m’i ka falur kunati”, prokurori i Vlorës para KPK: “Emrin te aksionet ma shënoi babai, unë s’di gjë”

Prokurori Erion Çelaj i Prokurorisë së Vlorës u përball të premten me Komisionin e Pavarur të Kualifikimit. Çelaj e ka filluar karrierën në sistemin e drejtësisë në vitin 1998 dhe ka punuar fillimisht si prokuror në Përmet dhe në Fier. Prej vitit 2008, ai e ushtron funksionin në Prokurorinë e Rrethit Vlorë.

Relatimi i KPK-së për pasurinë u fokusua më së shumti në një apartament në Selitë të Tiranës, i blerë nga subjekti në vitin 2012 kundrejt çmimit 48 mijë euro, pasuri për të cilën Çelaj pretendoi se nuk kishte shpenzuar asnjë “centezë” dhe se i ishte dhuruar nga vjehrri.

Komisioni i ka kaluar barrën e provës prokurorit Erion Çelaj se duket se nuk provohet që apartamenti të jetë përfituar nga vjehrri; nga hetimi administrativ nuk është provuar marrëdhënie mes ndërtuesit dhe vjehrrit.

Prokurori sqaroi se e kishte pasur të pamundur të siguronte dokumentacion provues për marrëdhënien mes vjehrrit, ortakut të tij dhe shoqërisë ndërtuese pasi kishte kaluar kohë e gjatë.

Ai kërkoi që Komisioni të vlerësonte edhe në frymën e vendimarrjeve të tjera, si dhe të analizonte duke konsideruar informalitetin. “Kjo pasuri është lënë amanet nga vjehrri i ndjerë dhe është realizuar vullneti i tij,” pohoi Çelaj.

Komisioni konstatoi gjithashtu pamundësi financiare për krijimin e një depozite bankare në vitin 2009 si dhe mungesë financiare në blerjen e dy automjeteve.

Çelaj shpjegoi në seancë se kishte harruar t’i deklaronte kursimet cash të vitit 2008 dhe i konsideroi harresë dhe pakujdesi edhe mosdeklarimin e transaksioneve për dy automjetet.

Sipas KPK, nuk është provuar burimi i ligjshëm i krijimit të dy depozitave në emër të dy fëmijëve në shumat nga 3990 USD secila. Prokurori ka deklaruar se vlerat e këtyre depozitave janë dhuruar nga vëllai i bashkëshortes.

Në seancë u evidentua edhe mosdeklarimi i zotërimit të 50 aksioneve në Shqërinë Albtelecom. Sipas relatores, subjekti nuk i ka deklaruar asnjëherë në vite këto aksione. “Duket se subjekti gjendet në shkelje të ligjit ‘Për parandalimin e konfliktit të interesave në ushtrimin e funksioneve publike’, pasi ka zotëruar aksione në një shoqëri që ka përfituar fonde publike”, tha Çiftja.

Subjekti deklaroi në seancë se nuk kishte pasur më parë dijeni për këto aksione. Ai shpjegoi se babai kishte qenë punonjës i Albtelecom dhe se ai kishte shënuar edhe emrin e tij kur shoqëria ishte privatizuar.

Çelaj kërkoi të konsiderohet i përshtatshëm për figurën, por nga verifikimi i sistemit TIMS,  në dhjetor të vitit 2013 subjekti ka udhëtuar jashtë shtetit me një shtetas që ka rezultuar se ka qenë i dënuar disa herë për disa vepra penale.

Sipas KPK, Çelaj ka qenë në dijeni të këtyre fakteve, pasi ka qenë drejtues i Prokurorisë së Vlorës kur shtetasi në fjalë është proceduar. I pyetur nga Komisioni, Çelaj ka deklaruar se shtetasin F.T. e njeh si pronar të një restoranti, por se nuk ka pasur kontakte dhe se nuk ka udhëtuar ndonjëherë me atë person.

Në fund të seancën dëgjimore, ai kërkoi konfirmimin në detyrë. KPK njoftoi se seanca për shpalljen e vendimit do të zhvillohet më 21 shtator, ora 12:45.

n.s. / dita