Vrasja e dyfishtë në dasmë, gjykata dënon me burg të përjetshëm një nga 2 vëllezërit

Gjykata e Elbasanit dënon me burgim të përjetshëm një nga dy vëllezërit Eshja, që akuzoheshin për vrasjen e dyfishtë të kunatit dhe vëllait të dhëndrit, pak momente pas përfundimit të dasmës. Trupi gjykues miratoi pretencën e prokurorisë, duke shpallur dje verdiktin në orën 15:30. Të pandehurit Blerim dhe Edmond Eshja akuzoheshin për veprën penale “vrasje në rrethana të tjera cilësuese”, në bashkëpunim. Blerimi u cilësua autori kryesor, duke marrë burgimin e përjetshëm, kurse Edmondi si bashkëpunëtor, dhe u dënua me 25 vite izolim. Ngjarja ndodhi më 9 shtator 2012, në fshatin Jagodinë të komunës Shirgjan, ku pas grindjes fillimisht në dasmë, për kërcimin dhe më tej në rrugë për një shtyrje, edhe nën efektin e alkoolit, vëllezërit kanë vrarë me thikë Mareglen Dushkun, vëllanë e dhëndrit dhe Pëllumb Belegun, kunatin, ndërsa kanë plagosur rëndë vëllanë tjetër, Mondi Dushku.