“Mos na detyroni të pushtojmë Selanikun”, këshilltari i Erdogan përmend “Betimin” e 1920-s, alarmon median greke: “Duan luftë, të fshehin krizën”

Këshilltari i Presidentit turk Erdogan, Yiğit Bulut ka alarmuar mediat kryesore greke me një postim që është konsideruar si kërcënim i hapur për Greqinë.

“Nëse struktura perandorake botërore vazhdon të sulmojë kombin e madh turk në çdo fushë, atëherë kombi i madh turk do të kthehet në kufijtë e Betimit Kombëtar” shkruan Bulut në një postim në Twitter.

Betimi Kombëtar turk është një deklaratë e vitit 1920, e cila ka gjashtë pika dhe është hartuar nga nacionalistët turq.

Ata përcaktojnë kufijtë e Republikës së ardhshme turke, në kufijtë e Perandorisë Osmane gjatë Luftës së Parë Botërore, ku përfshihen “zonat e Kirkutit, Selaniku, Aleppos dhe Mosuli”.

Mediat greke shkruajnë se “nacionalistët turq pranë presidentit Rexhep Tajip Erdogan kanë aspirata për pushtimin e Selanikut si rrugëdalje nga problemet e tyre të sotme ekonomike” thuhet në artikullin e gazetës greke “To Vima”.

Edhe intelektuali i njohur turk në mërgim Mehmet Efe Çaman e interpreton postimin e njeriut të afërt të Erdogan si mesazh për të larguar vëmendjen nga rënia e vazhdueshme e lirës.

“Kryekëshilltari i Erdoganit, z. Bulut, po kërcënon botën me zgjerim pas zhvlerësimit të vazhdueshëm të lirës” shkruan ai.

i.b. / dita