Barcelona nis procedurën për kontratën e re të Mesit

Presidenti i Barcelonës, Josep Bartomeu, ka nisur procedurat për përmirësimin e kontratës së Lionel Mesit. Sipas gazetës sportive katalanase “Sport”, pasuesi i Sandro Rosell po bën realitet premtimin e paraardhësit për ta bërë argjentinasin lojtarin më të paguar në botë. Barcelona dhe Mesi kanë biseduar që në verë mbi mundësinë e përmirësimit të kontratës së 26-vjeçarit, por blerja e Neimarit i ndryshoi kushtet. Me kushtet e reja të krijuara, Bartomeu mësohet se i ka kërkuar Horge Mesit, babait të Leos, të bëjë propozimet konkrete për përmirësimin e kontratës se re, që do ta bënte djalin e tij më të paguarin në botë. Pavarësisht kostos së lartë financiare, Barcelona synon të ruajë ekuilibrat në hierarkinë e klubit, ku katër herë fituesi i “Topit të Artë” duhet të qëndrojë gjithmonë në majë. Ndërkohë, nga Parisi, presidenti i PSG, Naser Al Khelaifi, mohoi të ketë pasur kontakte me përfaqësuesit e lojtarit të Barcelonës. Në një intervistë me “Le Parisien”, sheiku nga Katari deklaroi se për momentin është e pamundur blerja e Mesit, pasi këtë gjë nuk e lejon as Fair Play financiar i imponuar nga UEFA . “Nuk kam pasur asnjëherë kontakt me Mesin. Nuk kam folur asnjëherë as me Barcelonën. Për momentin kjo është diçka e pamundur, Mesi nuk vjen në Paris, sepse ekzistojnë limite”, deklaron pronari i PSG. Pak ditë më parë u fol se klubi i tij ishte gati të paguante klauzolën prej 250 milionë eurosh për prishjen e kontratës së Mesit me Barcelonën dhe se për këtë kishte biseduar edhe me të atin e lojtarit.