Skandali me zgjedhjet në FSHF, UEFA s’i beson Dukës. Ceferin: Do sjellim grup verifikimi për procesin

Skandali me manipulimet e zgjedhjeve në shoqatat rajonale të futbollit, ku drejtuesit më të lartë të FSHF po ndërhyjnë për rizgjedhjen e Armand Dukës, detyron UEFA-n të dërgojë në Shqipëri një grup kontrolli.

Lajmin e bën të ditur vetë kreu më i lartë i futbollit europian Ceferin i cili erdhi për një vizitë një ditore Tiranë. Në një prononcim për AP, Ceferin tregoi qartë se edhe UEFA ka dyshimet e saj në rregullsinë e këtij procesi zgjedhur duke paralajmëruar ardhjen e një grupi verifikimi. Ai apeloi për një proces transparent dhe korrekt.

“Së pari UEFA nuk ndërhyn në zgjedhje, por ne duam zgjedhje të ndershme, nuk duam asnjë ndërhyrje nga ndonjë palë tjetër. Takova kryeministrin sot dhe ishim pak të shqetësuar për situatën që kishim lexuar në media. Jam i kënaqur që me kryeministrin ishim dakord që futbolli duhet të vendosë për futbollin. UEFA do të japë të gjithë mbështetjen e saj, do të dërgojë njerëzit e saj këtu për të kontrolluar korrektësinë e zgjedhjeve dhe sigurisht, që të mos ketë asnjë ndërhyje nga asnjë palë jashtë futbollit”, u shpreh Ceferin.

Ai shtoi se gjërat duhet të jenë të qeta, dhe UEFA është gati të ndihmojë që çdo gjë të jetë e qetë.

“Çdo gjë duhet të jetë transparente dhe me qeverisje të mirë”, theksoi Ceferin.

j.l./ dita