Deri në 10,000 tifozë të futbollit do të mund të shikojnë falas finalen e UEFA Champions League këtë vit. Si asnjëherë më parë UEFA konfirmoi se çdo klub pjesëmarrës në finale do të marrë 5000 bileta falas që do t’u vihen në dispozicion mbështetësve besnikë.
“Ne menduam se do të ishte një mënyrë e mirë për të vlerësuar vështirësitë që ata kanë përjetuar gjatë dy viteve të fundit dhe se si megjithatë arritën të mbështesin ekipet e preferuara dhe t’i ndjekin me pasion edhe kur janë larg stadiumeve.” tha presidenti i UEFA-s, Aleksander Ceferin. “Tifozët po luajnë një rol integral në zhvillimin e futbollit dhe ne duhet të sigurojmë që mbështetësit besnikë të udhëtimit të mund të marrin pjesë në momente historike për ekipet e tyre të dashura me çmime të përballueshme”.
Finalja e UEFA Champions League do të zhvillohet në qytetin rus të Shën Petersburg më 28 maj.
Autoriteti europian konfirmoi që biletat pa pagesë u ofrohen klubeve përpara finaleve të tjera të mëdha të UEFA-s këtë vit.
8000 bileta falas do të ndahen mes finalistëve në UEFA Europa League në Budapest, ndërsa 6000 tifozë të futbollit mund të ndjekin finalen inauguruese të UEFA Europa Conference League në Tiranë.
Ndërkohë, 3000 bileta falas do të jepen për çdo klub pjesëmarrës në finalen e UEFA Champions League për femra në Torino.
UEFA ka vendosur gjithashtu të ngrijë çmimet e biletave të kategorive të caktuara për finalen e Ligës së Kampionëve për meshkuj për tre sezonet e ardhshme.
“UEFA është plotësisht e vetëdijshme për situatën aktuale inflacioniste, veçanërisht në lidhje me biletat për ngjarjet sportive që kanë pësuar rritje të konsiderueshme të çmimeve gjatë viteve të fundit”, shtohet në deklaratë.
“Duke vendosur të kufizojë çmimet për këto lojëra prestigjioze për të paktën tre sezone, UEFA dëshiron të dërgojë një sinjal të fortë për tifozët dhe të sigurojë që aksesi të jetë i përballueshëm për të gjithë”.
a.m/dita