“Tunel 200 metra i gjatë për të mbërritur poshtë bankës”, si u zbulua plani i grabitjes nga denoncimet e qytetarëve

Kanë qenë zhurmat e mjeteve të përdorura nga autorët që kanë shqetësuar qytetarët e zonës të cilët kanë njoftuar policinë e kryeqytetit për dyshimet e tyre.

Më pas policia ka nisur hetimet duke zbuluar tentativën për grabitje në bulevardin “Zogu I” të një banke të nivelit të dytë, përmes tuneleve.

Autorët kanë punuar gjatë ditës për të mbytur zhurmat, por megjithatë dridhjet e shkaktuara nga matrapiku dhe pajisjet e rënda kanë sjellë shqetësimin e qytetarëve.

Tuneli ka një gjatësi rreth 200 metra.

Pasi eshte njoftuar, Policia ka ndërhyrë dhe ka filluar hetimet.

Tuneli është zbuluar ditën e djeshme, por policia deklaroi se është gjetur një armë zjarri për të mos dekonspiruar operacionin.

Sot është bërë e ditur se bëhet fjalë për tentativë grabitjeje.

Policia në dorë ka disa objekte që dyshohet se kanë gjurmë gishtash dhe materiale biologjike të cilat janë çuar në laboratorin shkencor për të identifikuar autorët e ngjarjes.

Policia i ka fokusuar dyshimet e saj tek punëtorët e angazhuar për rikonstruksionin e bulevardit dhe ka kërkuar listën nga firma.

Gjatë gjithë bulevardit në pjesën e poshtme ka tunele që kalojnë pranë bankave. Sipas policisë autorët nuk kanë punuar më shumë se dy ditë dhe punonin gjatë orëve të ditës kur ka pasur lëvizje dhe zhurma për të mbytur zhurmat e matrapikut.

o.j/dita