Tre ambasadorëve më të rëndësishëm në Republikën e Shqipërisë (në vend të kartolinës)

Meqënëse, me praninë tuaj, nën kujdesin dhe këshillat tuaja si dhe me ndërhyrjet tuaja, gjatë vitit 2012 Shqipëria arriti:
– Të zërë vendin e parë në Evropë për korrupsion dhe të zbresë 18 vende poshtë në listën botërore të vendeve më të korruptuara.
– Të amnistojë fajtorët e masakrës së Gërdecit.
– Të mos arrestojë e dënojë fajtorët e vrasjeve të 21 janarit 2011.
– Të shtojë në mënyrë marramendëse pasuritë e pushtetarëve dhe familjeve të tyre.
– Të shpallë të pafajshëm  qeveritarët që, me zë dhe figurë, na treguan se po përgatiteshin të vidhnin gati një milion Euro dhe, nga ana tjetër, të ndalojë disa fëmijë të komunitetit Rom dhe t’iu konfiskojë atyre disa thasë me kanoçe që i mblidhnin në vendhedhjet e plehrave.
– Të vazhdojë të mos prodhojë thuajse asgjë (sipas Bankës Botërore).
– Të shtojë numrin e familjeve të ngujuara nga gjakmarrja.
– Të rrisë ndjeshëm shkallën e varfërisë së fëmijëve.
– Të shtojë frikshëm kriminalitetin (vetëm femra u vranë 25).
– Të zërë vendin e parë në botë për trukimet në sport.

Ne ju falënderojmë që:
– Na treguat se për t’u anëtarsuar në BE ka rëndësi miratimi i dy – tre Ligjeve dhe jo zbatimi i Ligjit nga qeveritarët.
–  Qeveritë tuaja janë gjithmonë me “të dobëtin” (madje, me “të dobëtit fare” si kryeministra, ministra, kryetar bashkish apo deputetë).
– “Popullit shqiptar i është hequr mundësia të ndërrojë lirisht qeverinë e vet” (sipas DASH ), por ai që “qëndron në krye të trukimit të zgjedhjeve” mund të vijojë të qeverisë një popull që e urren
– Na sqaruat se kryeministri që kërcënon opozitën se “Po erdhët edhe një herë para zyrës time do ua bëj më keq se në 21 janar…”, nuk ka bërë ndonjë gabim kush e din çfarë, por duhet qortuar se ” është shumë i drejtpërdrejtë”.
– Na premtuat se do të na rrini gjithmonë afër dhe do të monitoroni nga afër zgjedhjet e ardhshme (ashtu si ato të mëparshmet).

Dhe për vitin 2013, ju urojmë që:
– Ju të vazhdoni këshillat dhe konkluzionet as mish, as peshk, për shkaktarët realë të prapambetjes demokratike të Shqipërisë.
– Të monitoroni “nga afër” procesin zgjedhor të qershorit 2013, por ta përkufizoni “nga larg” përgjegjësinë e shkeljes së normave zgjedhore me të tilla klishe si “Edhe tek ne ka të meta në zgjedhje “.
– T’i cilësoni “burra shteti” dhe “yje në ngjitje” ata që ekzekutojnë popullin në rrugë dhe që vrasin votën dhe shpresën e tij
– Dhe, diplomacia e kafeneve dhe birrave, e aplikuar deri tani, të ketë sukses edhe në të ardhmen…

Duke na bërë të besojmë me mllef e  trishtim shprehjen e hidhur të Iain Pears: “Diplomacia dhe virtyti nuk ndihen mirë në shoqërinë e njëri – tjetrit”…
Mbetshi me shëndet, Viktor Malaj