Ngjela: Berisha, hoxhisti i fundit që kërkonte ta kthente realitetin në mitologji

Sali Berisha është politikani i fundit shqiptar hoxhist, që kërkonte ta kthente realitetin në mitologji.  Kështu shprehet Spartak Ngjela në një postim në profilin e tij në Facebook.

“Komunizmi kishte një vullnet të papërmbajtur për të kaluar realitetin në mitologji; dhe ai ia arriti për shtatëdhjetë vjet në rrafsh botëror që ta realizonte mësëmiri këtë. Edhe në Shqipëri po ashtu, çdo realitet kthehej në mitologji, sepse në çdo hap të jetës krijoheshin mite që fantazoheshin nga Enver Hoxha. Por, sëmundia nuk duket që të jetë larguar. Berisha mendoj se do të jetë i fundit person që vijoji rrugën e pushtetit politik të tipit hoxhist që, me anë të llomotitjeve të tij të pafundme, të kthente realitetin në mitologji. Ishte një ndermarrje e zbehtë kjo, të cilen shqiptarët më në fund e çorrën me një milone vota kundër tij”, thotë Ngjela.

Sipas tij, ende ka tendenca që realiteti të kthehet në mitologji, por brezi i ri tashmë është shumë realist dhe shoqëria shqiptare është duke krijuar një koshiencë.

“Por, loja ende vijon…ka sërish tendenca që realitetin ta kthejnë në mitologji, por gjithsesi, ajo që kam parë unë është fakti që, brezi i ri është realist, shumë realist, dhe sigurisht kundër çdo miti. Kjo mendoj se është gjendja e re që po krijon koshiencën realiste të shoqërisë shqiptare. Po të mos kthejmë tërësisht një koshiencë realiste në gjykimin e përditshëm, ne shqiptarët do të mbetemi skllevër të së kaluarës mitologjike dhe primitive në marrëdhëniet shoqërore”, shkruan Ngjela.