PS, përgjigje Bodes: Po shlyejmë borxhet që latë ju

PS reagoi sot në lidhje me akuzat e ish-ministrit të Financave, Ridvan Bode, për situatën ekonomike në vend. Në emër të PS, Ervin Bushati tha se qeveria aktuale po shlyen boxhet që la pas qeveria e Bodes. “Sot, kurajën për të sfiduar inteligjencën e shqiptarëve e pati dora vetë, ish-Ministri i Financave që gjatë 8 viteve në pushtet, e zhyti Shqipërinë në borxhe. Vetëm borxhi i padeklaruar i qeverisë së kaluar ndaj kompanive të kontraktuara për të ndërtuar infrastrukturë e për të ofruar shërbime — ishte plot 720 milionë dollarë. Ne këtë borxh jemi zotuar ta shlyejmë: që investimet të rriten, që punësimi të rritet, që infrastruktura të përmirësohet, që shërbimet të jenë cilësore”, tha Bushati Në vijim ai shtoi se ndërsa ata e zhytën vendin në borxh, ne po lajmë borxhet e tyre. “Falë buxhetit të ri, ne ulëm taksat për 97% të shqiptarëve, duke përmbushur premtimin tonë madhor që në katër muajt e parë të qeverisjes së re. Ne hoqëm taksën e biznesit të vogël dhe ulëm tatim fitimin për të gjithë bizneset e vogla, nga 10 në 7,5%. Doganat, në periudhën tetor 2013 – janar 2014 kanë mbledhur 17% më shumë të ardhura, krahasuar me të njëjtën periudhë një vit më parë. Tatimet, në periudhën tetor 2013 – janar 2014 kanë mbledhur plotë 3,9 miliardë lekë më shumë, krahasuar me të njëjtën periudhë një vit më parë”, theksoi Bushati.

Sipas tij, buxheti i qeverisë së re, injekton në ekonomi vetëm gjatë vitit 2014 plotë 1,1 miliardë dollarë; jo vetëm duke shlyer 350 milionë dollarë borxhet e krijuara nga qeveria e kaluar, por dhe duke investuar fort në ekonominë shqiptare. “Qeveria e re është e vendosur ta rimëkëmbë ekonominë dhe të rikthejë besimin e investitorëve vendas e të huaj në ekonominë shqiptare”, tha Bushati.

Bode: Qeveria po e çon vendin drejt recesionit

Deputeti demokrat, Ridvan Bode, akuzon qeverinë se po ndjek politika fiskale të papërgjegjshme. Në një deklaratë për mediat, Bode tha se treguesit ekonomikë janë në nivel më të ulët se sa në vitin 2012.

“ Të ardhurat e përgjithshme të buxhetit të Shtetit për vitin 2013 arritën në 328.6 miliard lek pra 1,8 miliard lek më pak ose 0,5% më pak se viti 2012. Borxhi i marrë nga qeveria ishte për qëllime të tjera, jo për ekonominë. Qeveria ka marrë borxh, jo për faturat e investimeve, por me këtë borxh ajo po rrit borxhin publik ”, u shpreh Bode.

Bode tha se ekonomia shqiptare po shkon drejt recesionit, për shkak të politikave të ndjekura nga qeveria, që sipas tij e kanë ulur kredibilitetin e saj tek investuesit të huaj. “Kreditimi i ekonomisë ka zbritur për herë të parë në terma negative. Inflacioni është në nivelet më të ulëta dhe kjo është rënie e kursit të ekonomisë, sepse ajo nuk mund të reagojë dot. Qeveria po zhvillon politika fiskale të papërgjegjshme, dhe si pasojë janë ulur në minimum investimet e huaja direkte. Kjo tregon rënien e kredibilitetit të investuesve të huaj ndaj qeverisë aktuale”, tha ai.