Ja se si u kap legjenda e gjallë e drogës “El Çapo”

Për 13 vjet Joaquin “El Çapo” Guzman fshihej në malet perëndimore të Meksikës, ndërsa  autoritetet kapnin ose vrisnin drejtuesit e çdo grupi që sfidonte kartelin e tij të konsideruar si “maja” e trafikimit global të drogës

Ndërsa historia e Guzman, i cili nga një fshatar i rëndomtë arriti të pozicionohej në listën e miliarderëve të revistës “Forbes” u kthye gati-gati në një legjendë, bindja e përgjithshme se ai ishte lordi i drogës më i fuqishëm në botë, e bënte atë më të kërkuarin, e njëkohësisht më të paprekshmin. Por vitin e fundit, autoritet filluan ta ngushtonin rrethin e të besuarve të tij.

Më 13 shkurt, një burrë i njohur me nofkën “19”, të cilin zyrtarët e konsideronin si shefin e ri të vrasësve të kartelit të Sianloas, u arrestua me dy të tjerë në qytetin bregdetar të Mazatlan. Katër ditë më vonë, një anëtar i rangjeve të larta të Sinaloas u kap së bashku me 4.000 tranguj dhe banane të mbushura me kokainë.  Ndërsa nga mesi i javës së kaluar të paktën 10 “xhelatë” të organizatës u arrestuan.

Agjentët mësuan se Guzman, 56 vjeç, kishte nisur të zbriste nga malet e tij të izoluara, për të dëfryer në qytetet  Culiacan dhe Mazatlan. “Ky ishte gabimi i tij fatal”, thotë Vigil një ish-oficer i DEA-s.

Duke punuar mbi informacionet e ofruara nga truprojat e Guzmanit, marinsat meksikanë depërtuan në shtëpinë  e ish-bashkëshortes së tij, duke shkallmuar derën kryesore. Ndërsa ata hynin me forcë në banesë, Guzman rrëshqiti në një kalim sekret, dera e fshehtë e të cilit ishte e vendosur poshtë vaskës në banjo. Shkallët të çelikut të çonin në një rrjet tunelesh të lidhura me kanalet e ujërave të zeza. Këto lidhnin gjashtë shtëpi të tjera në Culiacan.

Guzman iku në jug të Mazatlan. Ekipi i agjentëve amerikanë të DEA-s ngritën një bazë operacioni me marinsat meksikanë dhe u vunë në ndjekje të tij.

Të shtunën në mëngjes, mbretërimit të El Çapos i erdhi fundi ( dhe pa një të shtënë të vetme arme). Marinsat rrethuan rrugën e plazhit në Miramar dhe  pallat 10-katësh me pamje nga Paqësori. Duke shpërthyer derën e një apartamenti  në katin e katërt, ata kapën njeriun më të kërkuar të Meksikës.

Një banor që refuzoi të identifikohej tha se apartamenti ishte marrë me qira vetëm dy ditët e fundit. Guzman u kap me një femër të paidentifikuar, teksa të dy ishin ende në gjumë. U tërhoqën zvarrë nga shtrati, ndërsa mbi të shumëkërkuarin u ushtrua dhunë. Brutaliteti i operacionit u konfirmua edhe nga disa agjentë që morën pjesë në aksion.

Organizata kriminale e Sianloas u  bë fokusi i shërbimeve të anti-drogës në Amerikë dhe Meksikë  pas një varg arrestimesh, sidomos pas kapjes në korrik 2013 të “kokës” së kartelit të fuqishëm “Los Zetas”, Miguel Angel Trevino Morales. Kështu nën shënjestrën e tyre u vu “peshku më i madh” i mbetur ende në qarkullim.

Arrestimi i Guzman lehtëson shqetësimet e Shteteve të Bashkuara se administrata e presidentit meksikan, Enrique Peña Nieto, ka reduktuar bashkëpunimin me SHBA-të kundër krimit të organizuar.

“Ky është, pa dyshim, suksesi më i rëndësishëm i administratës  së Peña Nietos”, shprehet  Raul Benitez, një ekspert i sigurisë në Universitetin Kombëtar të Meksikës.

Pas arratisjes nga burgu në vitin 2001, me një kamion që transportonte teshat e të burgosurve, Guzman jetoi nga pak kudo, në boshtin territorial Argjentinë-Meksikë, duke krijuar të ashtuquajturin “Trekëndësh të Artë”, një rajon malor të kultivimit të marijuanës në shtetet veriore të Sinaloas, Durangos dhe Chihuahuas.

Në vitin 2013, ai u shpall “armiku publik nr 1” nga Komisioni i Krimeve në Çikago, personi i dytë i konsideruar i tillë  që nga “era e Al Kapones”./ Dorina Gjuzi