Fituesi i javës në lojën Gjeni Diçiturën

Bingo! Djali që ka fituar orën këtë javë është… 25 vjeç. Kjo është mosha më e ulët ndër fituesit e deritanishëm në lojën me lexuesit tanë. Etjon Hoxha është një këpucar profesionist, djalë i një familje që e ka trashëguar këtë zanat në breza, Etjoni është  i martuar dhe baba i një vajze 2 vjeçar me ermin Etna. Shtysa për të marr pjesë në lojën tonë ka qenë bashkëshortja e tij. Dhe kërkesa e saj ka patur një qëllim, Etjoni në datën 27 ka ditëlindjen (sot) dhe ajo i kishte kërkuar të dërgonte një mesazh në numrin e telefonit të vendosur në gazetë. Më fat se kaq nuk mund të kesh! 🙂

Etjoni na tregon se lexon më shumë gazetat sportive. DITA-n e blejnë prindërit e tij. “E marrin përditë në kioskën që kemi afër këpucarisë pranë Gjykatës së Tiranës – na tregon Etjeni. Ai është i sinqertë kur na thotë që lexon faqet sportive të DITA-s. “Por babi më thotë shpesh se vetëm ajo çka shkruhet në këtë gazetë është realiteti” – tregon ai.

Kthehemi pak te profesioni i këpucarit, i cili duket një profesion në zhdukje, por jo, Etjoni na tregon se nuk është tamam kështu. Keni besuar që këpucët shkojnë t’i riparojnë vetëm të varfrit? Etjoni na i hedh poshtë këtë ide: “Vijnë edhe njerëz të kamur me këpucë të shtrenjta. Nëse e blen një këpucë 200 apo 300 euro, atëherë të vjen keq ta hedhësh poshtë vetëm për një riparim të vogël që ajo mund të dojë – thotë lexuesi ynë i ri.

Pyetja se cili profesion i gris më shumë këpucët e kap pak gafil. Mendohet… “Ai që ecën shumë në këmbë” – thotë me të qeshur dhe pastaj shton:  “Nuk është vetëm te profesioni, por edhe mënyra se si ecën njeriu. Nëse ecën keq, këpuca prishet shpejt”.