SHËNIM: “Hajdut karburanti”, mbrohet nga shteti!

Ka provokuar akoma më shumë irritim një lajm sipas së cilit, pas hetimesh disamujore, janë ndaluar një administrator e dy menaxherë pikash karburanti, të akuzuar për abuzim në shitje, ose më qartë: për vjedhje të klientit, duke i shtënë në serbator më pak karburant sa ka paguar. Emrat e të ndaluarve janë dhënë të plotë, por kompanitë e karburanteve ku ata kanë punuar, janë dhënë vetëm më iniciale. Me pak mund e inteligjencë, ato mund të mësohen se cilat janë, por oponioni mbetet i habitur deri në nervozizëm, se përse nuk bëhen publikë qartazi emrat e kompanive, siç janë bërë së fundi publikë dhe emrat e të ndaluarve?! Eshtë një mesele kjo që vijon prej muajsh. Dhe pavarësisht reagimeve, qytetari e njëherësh konsumatori, privohet nga e drejta që të informohet se cili i ka futur duart në xhepa duke e vjedhur. Është një rast kur shprehja popullore “më mirë të të dalë syri sesa nami”, merr një vlerë të veçantë ndëshkuese, duke u ndryshuar vendet fjalëve: “më mirë t`u dalë nami sesa syri”, që do të thotë se konsumatori nuk kërkon ndëshkimin me “nxjerrje syri”  të hajdutit – burg në këtë rast – por më shumë që t`i dalë nami, i zi sigurisht, si hajdut. Mirëpo ngjan sikur po mbrohet nga shteti!   / E.H.