Klithmat e një nate protestash në Stamboll: “Erdogan vrasës!”

 Për Turqinë, nata midis së martës dhe të mërkurës ka qenë  më e gjata që nga revoltat e parkut Gezi, i shndërruar në simbolin e represionit më brutal të pushtetit mbi protestuesit. Mijëra persona dolën në rrugë për të manifestuar dhimbjen dhe zemërimin e tyre për vdekjen e Berkin Elvan, 15-vjeçarit që ndërroi jetë pas 9 muajsh në koma. Ai u godit gabimisht në kokë nga një granatë lotsjellëse gjatë manifestimeve të qershorit, ndërsa kishte dalë nga shtëpia për të blerë bukën dhe jo për të protestuar.

Sapo u përhap lajmi për vdekjen e tij, qindra të rinj u mblodhën përpara spitalit ku qëndronte i shtruar në Stamboll dhe nisën të bënin thirrje kundër qeverisë dhe kryeministrit turk. Vetëm disa minuta më vonë mbërriti policia që ndërhyri me gaz lotsjellës . Në Ankara, një burrë u ul në sheshin Kizilay në zemër të qytetit, ndërsa para vetes vendosi një copë bukë dhe një karton ku shkruhej: “Jam Berkini”. Brenda disa minutave dhjetëra të tjerë u ulën afër tij dhe e imituan. Manifestime solidariteti dhe ngushëllimi u zhvilluan në qytete të tjera të vendit, si në Smirne, Antalia, Antiokia. Në Stamboll, në lagjen alevite Okmeidani, dyqanet ulën qepenat duke u solidarizuar për zinë, ndërsa studentët e universiteteve vendosën të bojkotojnë leksionet. Të gjithë bërtisnin:  “Hukumet istifa” (Qeveri largohu)n dhe sërish “Erdogan katil” (Erdogan vrasës). Policia për t’i ndaluar përdori topa uji dhe gaz lotsjellës.

Një ndjenjë zemërimi ndaj ekzekutivit islamik të moderuar që nuk shihej prej muajsh, i nxiti edhe turqit që jetojnë jashtë të protestojnë në distancë. Disa lagjeve në Stamboll  dhe Ankara iu vu zjarri. Në Kadikoi (pjesa aziatike e qytetit) mijëra njerëz që përpiqeshin të arrinin sheshin Taksim, u sulmuan brutalisht dhe u bllokuan nga policia. Në Ankara qindra manifestues u detyruan të strehohen në qendrën tregtare për t’iu shpëtuar shkopinjve të gomës dhe gazit lotsjellës. Bilanci i personave të arrestuar ishte mbi 200, ndërsa dhjetëra të tjerë u plagosën, një pjesë në gjendje të rëndë.

Nëse atmosfera në rrugët e Turqisë është e nxehtë, ajo në korridoret e pushtetit nuk është më pak. Rrethi përqark kryeministrit Erdogan po bëhet gjithnjë e më i ngushtë. Presidenti i Republikës, Abdullah Gul dhe lideri islamik, Fetullah Gulen, të cilët i përkasin rrymës së djathtë islamike, shprehën dhimbjen e thellë për humbjen e të riut. Gulen foli me tone të zjarrta, duke thënë se Berkin ishte vetëm viktima e fundit në këtë kohë urrejtjeje nëpër të cilën po kalon Turqia. Nëna e Berkinit iu tha gazetarëve: “Nuk ishte Zoti, por Erdogan që ma mori djalin tim”

Kryeministri turk është përfshirë gjatë muajve të fundit nga skandalet e korrupsionit dhe mbi të janë shtuar akuzat për represion të paprecedent ndaj lirisë së shtypit. Sytë e të gjithë vendit janë vendosur mbi të, ndërsa vazhdon me fushatën e tij elektorale për zgjedhjet administrative që do të zhvillohen më 30 mars.

Të mërkurën Stambolli vajtoi për herë të fundit Berkinin. Por ekziston risku që vdekja e adoleshentit mund të jetë vetëm fillimi i një reaksioni zinxhir dhe i një përballjeje të re midis Erdoganit që si gjithnjë nuk do të bëjë asnjë milimetër prapa dhe një pjese të madhe të Turqisë, e cila nuk e do më në pushtet./ Dorina Gjuzi