Superliga, kryesuesit, vizita në zonën e akullt të renditjes

Dy skuadrat kryesuese të kampionatit do të luajnë në transferta të vështira sot, edhe pse përballë do të kenë skuadrat e vendeve të fundit. Skënderbeu luan në Lushnjë, ku ka fituar në takimin e parë, por kampionët do të kenë një numër të madh mungesash për takimin e sotëm. Nga kjo marrin zemër vendasit e Artan Banos, të cilët kanë nevojë urgjente për pikë, për të siguruar mbijetesën. Aktualisht Lushnja është e parafundit, me një pikë më tepër se Kastrioti dhe një më pak se Bylis. Ky i fundit pret Laçin dhe fitorja do ta barazonte përkohësisht me Tiranën, jashtë zonës së ftohtë. Takimet e tjera të javës së 24-t do të luhen nesër dhe midis tyre spikat takimi midis Vllaznisë e Partizanit. Takimi i fazës së dytë, i mbyllur në barazim 1-1 në “Loro Boriçi”, u karakterizua nga gabime të mëdha të gjyqtarit Remzi Sadiku, tejet i njëanshëm në favor të vendasve të rrezikuar për të mos rënë nga kategoria. Në Kavajë, Besa mund të vijojë ecurinë pozitive, pasi pret Kastriotin e drejtuar nga Nevil Dede e që mban vendin e fundit. Duket se nuk do të ketë më rreziqe tani për skuadrën e Artan Mergjyshit, e cila pretendon një vend në Evropë dhe takimi me të fundit në renditje i jep shanse të përmirësojë pozitat. Tirana do të presë Kukësin, pas fitores së arritur dy javë më parë në “Qemal Stafa”, pas së cilës tifozët kuksianë kontestuan skuadrën e tyre dhe presidentin Safet Gjici, duke i akuzuar për tolerim, aq sa bënë më pas thirrje për t’ia lënë Vllaznisë takimin që vijonte, i mbyllur në barazim 1-1. Në Vlorë, Flamurtari dhe Teuta do të synojnë vetëm fitoren përballë njëra-tjetrës, në të kundërt Europa League do të jetë e vështirë për t’u arritur.

Kategoria Superiore

Java e 24-t

Sot

LUSHNJA-SKËNDERBEU   14:00

BYLIS-LAÇI           14:00

Nesër

VLLAZNIA-PARTIZANI   14:00

BESA-KASTRIOTI       14:00

TIRANA-KUKESI        17:00

FLAMURTARI-TEUTA           17:00

Renditja

N  Skuadra      P    Gol  F    B    H

1  Skënderbeu   48   35:17 14   6    3

2  Laçi         37   26:21 11   4    8

3  Partizani    36   22:16 10   6    7

4  Kukësi       34   23:24 9    7    7

5  Besa         33   27:24 9    6    7

6  Teuta        32   31:28 7    11   5

7  Flamurtari*  30   30:30 9    6    8

8  Tirana       27   15:21 7    6    10

9  Vllaznia     26   27:28 6    8    9

10 Bylis        24   20:23 5    8    9

11 Lushnja      23   21:34 6    5    12

12 Kastrioti    22   14:25 6    4    13

* Flamurtari -3 pikë