Skënderbeu vazhdon marshimin drejt titullit të katërt radhazi, duke arritur një tjetër fitore në Lushnjë, edhe pse kishte disa mungesa në formacion. Kampionët e Shqipërisë arritën të kryesonin 3-0 në pjesën e parë, duke mos lënë dyshime për rezultatin përfundimtar, falë edhe portierit Shehi që priti një penallti menjëherë pas avantazhit me golin e Lilajt. Por, Lushnja ngushtoi menjëherë diferencën pas golit të tretë të korçarëve, ndërkohë që tri minuta pas pushimit Sula shënoi edhe golin e dytë. Takimi u rihap dhe Lushnja besoi te mrekullia, por deri gjashtë minuta para fundit, kur Pero Pejiç i dha goditjen përfundimtare, me golin e katërt. Një tripikësh me vlera për skuadrën e Mirel Josës, ndoshta jo aq për renditjen, kur Skënderbeu është i shkëputur, se sa për moralin e skuadrës, e cila kishte shtatë mungesa për arsye të ndryshme. Tani kampionët kanë 51 pikë, plot 13 më tepër se Laçi në vendin e dytë, ndonëse të gjitha gjasat janë që kurbinasit t’i marrin pikët e plota në tavolinë. Mund t’i kishin marrë edhe në fushë, kur Vucaj goditi nga pika e penalltisë në minutën e fundit, por kapiteni gaboi qëllimisht për të mos lejuar rëndimin e një situate që gjithsesi shkoi për keq pas përfundimit të lojës. Bylisit i duhej me çdo kusht fitorja për të mbijetuar, por kërkoi ta merrte në mënyrën më të keqe dhe me sa duket nuk do të jetë në Kategorinë Superiore sezonin e ardhshëm. Takimi u karakterizua nga tensioni, edhe pse në stadium nuk kishte spektatorë. Kulmi arriti me dhunën në fund, me protagonist Besnik Kapllanajn, president i klubit. Në pritje të vendimit nga Komisioni i Disiplinës, Laçi ka dy pikë më tepër se Partizani, i cili luan sot në Shkodër, përballë Vllaznisë së rrezikuar.
Kategoria Superiore
Java e 24-t
Dje
LUSHNJA-SKËNDERBEU 2-4
Fonseka 37′, Sula 48′ / Lilaj 8′, Pejiç 20′, 84′, Ribaj 35′
BYLIS-LAÇI 0-0
Sot
BESA-KASTRIOTI 14:00
VLLAZNIA-PARTIZANI 14:00
FLAMURTARI-TEUTA 17:00
TIRANA-KUKËSI 17:00
Renditja
N Skuadra P Gol F B H
1 Skënderbeu 51 39:19 15 6 3
2 Laçi 38 26:21 11 5 8
3 Partizani 36 22:16 10 6 7
4 Kukësi 34 23:24 9 7 7
5 Besa 33 27:24 9 6 7
6 Teuta 32 31:28 7 11 5
7 Flamurtari* 30 30:30 9 6 8
8 Tirana 27 15:21 7 6 10
9 Vllaznia 26 27:28 6 8 9
10 Bylis 25 20:23 5 9 9
11 Lushnja 23 23:38 6 5 13
12 Kastrioti 22 14:25 6 4 13
* Flamurtari -3 pikë