I ngacmon gruan në rrugë, burri i këput veshin 32-vjeçarit

Një grindje për shkaqe xhelozie për pak i ka kushtuar veshin një të riu në qytezën e Bilishtit.

41-vjeçari Ferdinand Mulla i ka këputur veshin me dhëmbë 32-vjeçarit me iniciale F.LL, i cili i ka ngacmuar gruan. GSH shkruan sot se sipas dëshmive të dhëna nga të dy personat e konfliktuar, bashkëshortja e 41-vjeçarit ka qenë duke kaluar në rrugë, por është ngacmuar me fjalë nga 32-vjeçari F.LL., teksa e gjithë skena është parë nga bashkëshorti i saj, Ferdinand Mulla, i cili ka qenë i ulur në një lokal aty pranë. Sapo ka parë 32-vjeçarin që ka ngacmuar bashkëshorten e tij, babai i dy fëmijëve është ngritur i revoltuar nga lokali dhe pas një debati me fjalë, ka nisur ta qëllojë me grushte të riun në rrugë. Ai nuk është ndalur më tej, por e ka kafshuar në vesh, duke i këputur një pjesë të tij.

Banorë të zonës kanë ndërhyrë për të qetësuar gjakrat, ndërsa më pas 32-vjeçari është dërguar në spitalin e Korçës. Policia ka arrestuar në flagrancë 41-vjeçarin Ferdinand Mulla, nën akuzën e “plagosjes së rëndë me dashje”.