Mesila, frikë nga përjashtimi: Do flas derisa të shpiket ai “neni”

Situata brenda godinës së SHQUP-it nuk është aq e qetë sa mundohet ta paraqesë kryetari i PD-së me një buzëqeshje pas çdo daljeje publike. Oponentët e Lulzim Bashës nuk ndihen të sigurt për karrierën e tyre politike. Shumë syresh flasin në tryeza se ndihen të mënjanuar nga kryetari i ri, edhe pse me Berishën kanë pasur një karrierë për t’u pasur zili. Ka nga ata që këtë shqetësim e shprehin dhe hapur, siç është deputetja Mesila Doda e cila me sa duket nuk është në planet e partisë që ka në kokë Basha. Deputetja e cila njihej si një mbështetëse e deputetit të ndjerë Sokol Olldashi, ka folur hapur duke lëshuar disa kritika ndaj selisë blu.

“PD është e destinuar të forcohet vetëm duke ndryshuar veten. Unë sot flas për PD dhe do vazhdoj të flas, sepse është ky momenti i ristrukturimit, kjo është ende koha e pas-humbjes dhe kjo kohë mundet të na shërbejë për të rikthyer frymën e vërtetë të debatit, të objektivitetit në evidentimin e fenomeneve negative që mbisunduan vitet e fundit dhe mbi të gjitha të mundësojmë transformimin në një parti të formatit modern, në një parti në të cilën piramida e pushtetit mundet të kthehet lehtësisht me bazë lart, pasi është kontributi i bazës së gjerë të militantëve që sjell suksesin e një force politike e bashkë me të edhe suksesin e kreut”, shprehet Doda.

Por ajo nuk nguron të flasë edhe për frikën se mund të përjashtohet nga PD. “Për ata që ende s’duan ta kuptojnë, do të thotë se unë do vazhdoj të mbetem në PD, do kërkoj të bëj një PD më të mirë, siç deklarova ditën kur mësuam humbjen e 23 qershorit, derisa të shpiket një nen i ri në statutin e PD që quhet përjashtim. Deri atëherë do duhet që të gjenden edhe arsyet pse mund të përjashtohet një anëtar dhe deputet…Por, a mund të jetë argument keqpërdorimi i lirisë në Shtëpinë e Lirisë?”-shprehet Doda.

Situata brenda PD dhe njerëzit e Berishës

Mesila Doda prej disa muajsh ka qenë kritike me zhvillimet brenda partisë së saj. Ajo gjatë garës për kreun e partisë u pozicionua qartë në krah të Olldashit dhe kjo e bëri që të shihej si armike nga Lulzim Basha. Gjatë muajve të vjeshtës ajo pati dhe shtrëngim duarsh me kryeministrin Rama duke sjellë reagime të ashpra kundra saj brenda opozitës. Por, Doda nuk është e vetmja që e ka jetën e vështirë në atë parti. Edhe Jozefina Topalli nuk ndihet fare në komoditet, dhe as Majlinda Bregu. Basha këto dy figura ka vendosur që do t’i zëvendësojë me Jorida Tabakun dhe Grida Dumën. Të përjashtuar edhe pse jo zyrtarisht ndihen dhe Astrit Patozi dhe Ridvan Bode, për të mos folur për emra të tjerë. Shumë nga emrat që janë të mënjanuar kanë qenë në poste të larta në kohën e Berishës dhe duke qenë se Lulzim Basha është vendosur në krye nga Berisha do të ishte logjike që të ishin të njëjtët figura që do të ishin në krye. Por Berisha në këtë pikë i ka lënë dorë të lirë Lulzim Bashës. Ai i ka dhënë vetëm disa emra të paprekshëm dhe me të tjerët të bëjë si ta shohë të arsyeshme kryetari i ri. Berisha në tryezën e Bashës ka lënë një listë me pak emra që do të jenë sërish në kupolën drejtuese të partisë. Bëhet fjalë për njerëz që Berisha ka bashkëpunuar dhe u ka besuar shumë. Duke filluar nga Oerd Bylykbashi, Keltis Kruja, Aldo Bumçi, Eduard Halimi, Genc Pollo e deri te Arben Ristani. Në çdo rrethanë këta do të jenë në forumet më të larta të partisë edhe në vijim. Për pjesën tjetër do të vendosë Basha, i cili ka sfidë të dyfishtë, e para të organizojë partinë e dyta të luftojë ndaj një mazhorance të stërmadhe.

Pse nuk duhen zërat kundra?!

Kur je në opozitë është e domosdoshme që partia të jetë tolerante edhe me zërat kundra. Luksi për përjashtime nuk eksiton kjo dhe për efekt numrash. Por me sa duket Basha e ka llogaritur që do të jetë në opozitë për një kohë të gjatë dhe oponentët do ta vështirësonin punën e tij. Pas një viti janë zgjedhjet lokale dhe humbja e pritshme e PD-së do të bënte që zërat kundër të kërkonin që kryetari të merrte përgjegjësitë. Me largimin dhe mënjanim e kundërshtarëve, Basha do të ishte me i qetë me çfarëdo rezultati në pranverën e ardhshme.