Teuta ka arritur fitoren e dytë për vitin 2014 dhe të parën nën drejtimin e trajnerit Ilir Biturku. Skuadra durrsake mundi dje Besën falë një goli të vetëm, shënuar nga mbrojtësi Idrizaj në minutën e 67-të, për javën e 25-të të Kategorisë Superiore. Teuta e dominoi takimin dhe krijoi mjaft raste për të shënuar, përfshirë edhe një penallti në minutën e 39-të humbur nga Daniel Xhafaj. Gjuajtja e sulmuesit veteran u prit nga portieri i ri Lika, i cili zëvendësonte Bejtjen. Artan Mergjyshi kishte shumë mungesa në formacionin e tij, çka bëri që Besa të mos dilte në lojën e saj. Me fitoren e arritur, durrsakët ngjiten në vendin e pestë, në pritje të ndeshjeve të tjera, ndërkohë që shkojnë më të qetë në përballjen me Kukësin, për takimin e parë gjysmëfinale të Kupës së Shqipërisë. Ndeshja e djeshme në “Niko Dovana” është e vetmja e luajtur për këtë javë, por ndërkohë dihet edhe një rezultat tjetër. Skënderbeu merr tri pikët pa luajtur këtë javë, pasi kundërshtari është Bylis, i përjashtuar nga kampionati. Sipas rregullores, kur është luajtur gjysma e kampionatit, rezultatet e mëparshme të skuadrës së përjashtuar qëndrojnë në fuqi, ndërsa takimet e mbetura humben në tavolinë 3-0.
Kategoria Superiore
Java e 25-të
Dje
TEUTA-BESA 1-0
Idrizaj 67’
Sot
SKËNDERBEU-BYLIS 3-0
Rezultat në tavolinë
KUKËSI-FLAMURTARI 14:00
PARTIZANI-TIRANA 20:00
Nesër
LAÇI-VLLAZNIA 14:00
KASTRIOTI-LUSHNJA 14:00
Renditja
N Skuadra P Gol F B H
1 Skënderbeu 54 42:19 16 6 3
2 Laçi 40 29:21 12 4 8
3 Partizani 39 23:16 11 6 7
4 Kukësi 37 25:25 10 7 7
5 Teuta 36 32:28 8 12 5
6 Besa 34 28:26 9 7 8
7 Flamurtari* 31 30:30 9 7 8
8 Tirana 27 16:23 7 6 11
9 Vllaznia 26 27:29 6 8 10
10 Lushnja 23 23:38 6 5 13
11 Kastrioti 23 15:26 6 5 13
* Flamurtari -3 pikë, Bylis i përjashtuar