Në shkollat e rretheve nuk ka mësues informatike

Zhvillimet në fushën e teknologjisë së informacionit po marrin një hov të madh,ku tashmë gjithçka sa i takon procedurave po kryhet online. Një ndër to, është edhe procesi i aplikimeve për shkollat e larta, që së fundmi ka përqafuar tërësisht këtë tendencë. Janë me mijëra maturantët në të gjithë vendin që çdo vit do të aplikojnë nëpërmjet sistemit online për t’u bërë pjesë e garës për pranimet në shkollat e larta publike, teksa pak prej tyre arrijnë që t’i përfundojnë vetë procedurat e aplikimit online, pa ndihmën e mësuesve. Kjo për shkak të mungesës së njohurive të fituara në lëndën e informatikës, mësuesit e të cilës janë në mungesë. Në rrethe, lënda e informatikës nuk jepet nga mësuesit që kanë kryer studimet universitare në këtë specialitet. Kjo mungesë e theksuar e mësuesve të informatikës shfaqet veçanërisht në zonat më të largëta. Për vite me radhë, lënda e informatikës në pjesën dërrmuese të shkollave të arsimit parauniversitar, ose atyre të mesme në rrethe është mbuluar nga mësuesit e lëndëve të matematikës, biologjisë apo fizikës, të cilët japin mësim në këtë lëndë në sajë të ndonjë kursi të kryer për përdorimin e kompjuterit, (e jo të ndjekjes së studimeve të larta në këtë profil). Në kushtet kur tregu i punës kërkon gjithnjë e më shumë njerëz të specializuar në këtë profil, nevojitet ndërhyrje urgjente në hartimin e politikave që nxisin të diplomuarit në informatikë apo degët e tjera të zhvillimit të teknologjisë së informacionit që të mos braktisin kthimin e tyre në rrethe. Dekani i Fakultetit të Shkencave të Natyrës, Mynir Koni vë në dukje edhe pse është shtuar numri i të diplomuarve në lëndën e informatikës, këta të fundit preferojnë që të mos kthehen më në vendin e tyre për të dhënë mësim, çka krijon boshllëqe të shumta në plotësimin  e nevojave me mësues specialistë të kësaj fushe në shkollat e rretheve. Dekani Koni sqaron se të diplomuarit për informatikë nuk duan të kthehen në rrethet nga vijnë, e aq më pak të punojnë në arsim, pasi e shikojnë si një profesion pa perspektive. Sipas tij, duhen të paktën 3 vjet për të plotësuar me mësues të mirëfilltë informatike shkollat 9-vjeçare dhe të mesme, kryesisht ato të rretheve. E për të ndrequr këtë fenomen kërkohet ndërhyrja e qeverisë, me hartimin e politikave të veçanta, të cilat do të ndihmojnë dhe stimulojnë të rinjtë që të shkojnë në rrethet e tyre për të dhënë mësim. “Pjesa kualitative duhet të jetë e shpërndarë në tërë Shqipërinë. Për këtë arsye duhen hartuar dhe ngritur mekanizma të veçantë të stimulimit të kuadrove, për të shkuar qoftë në vendin tyre, po pse jo edhe nxitjen e atyre nga Tirana për të dhënë mësim në rrethe të ndryshme të vendit”, sqaron Koni. Nevojat e mëdha për më shumë mësues informatike veçanërisht në rrethe janë konfirmuar edhe nga vetë Ministria e Arsimit Lindita Nikolla. Gjatë ceremonisë së inaugurimit të Godinës D, pranë Fakultetit të Shkencave të Natyrës, ajo ka sqaruar se me reformën që do të përfshijë arsimin e lartë synohet jo vetëm shtimi i mësuesve që do të japin lëndën e informatikës, por edhe nxitja e tyre për të shkuar në rrethe, në mënyrë që të mos kemi me mungesa të specialistëve të kësaj fushe.. “Po punojmë edhe për sa i përket përmirësimit të nivelit të përdorimit të teknologjisë në shkollat nëntëvjeçare, me objektivin që të prezantojmë përmbajtje dhe pajisje dixhitale edhe aty në një fazë të dytë.  Reforma në përdorimin e teknologjisë së informacionit do të ofrojë një siguri më të madhe në aftësimin e nxënësit dhe mësuesit drejt sfidave të reja”, ka deklaruar ministrja Nikolla. Lënda e informatikës mësohet që në klasën e shtatë, për të vijuar deri në mbylljen e shkollës së mesme Sipas autoriteteve të arsimit maturantët që vendosin të studiojnë këtë degë në universitete janë më të mirët. Deri në 500 shkon numri i kandidatëve që përzgjidhen për të marrë pjesë në këtë aktivitet thuajse të gjithë synojnë programimin, sepse edhe paga është të paktën dyfish më e lartë se rroga e një mësuesi Informatike.