A është ‘Muli’ frymëzimi i PD-së?!

Nuk dihet se mbi ç`kritere është zgjedhur nga një e përditshme pikërisht ish-ministri i rendit, Flamur Noka,  për t`u shprehur lidhur me aktualitetin politik, por të ngjan se interesi ka qenë për të grishur lexuesin nëpërmjet tingëllimit komik që bart ky emër, kur është fjala pikërisht për atë, Mulin e PD-së, që duket se nuk e ka hiç për dert, jo namin si i tillë në opinion e “salloneve” të politikës, por mungesën e një përpjekjeje sado të pakët për ta përgënjeshtruar këtë namin të zi mbi veten, teksa ka plot shanse.

Dhe ja një i tillë siç është një intervistë në gazetë, që zakonisht realizohet me pyetje të dërguara paraprakisht e përgjigje të hartuara në rrethana komode (sepse nuk je live si në TV), me avantazhin që fjalitë të hartohen sa më korrekte, si nga përmbajtja leksikore e si nga ajo inteligjente. Por duket se është e pamundur. Prononcimet e Nokës në intervistën e tij, e kthejnë kalendarin politik 20 e kusur vite mbas, ku dhe atëherë, të tilla shprehi fshatçe (në kuptimin më të rëndomtë të fjalës), kurrsesi nuk mund t`i hasje në lidershipin qëndror të PD-së, përplot me emra të mendjes e kontributeve të njohura në shoqëri, por tek ndonjë militant province, që përligjet sipas fjalorit të urtësisë popullore, me devizën: aq mendon e aq thotë…ndaj mos ja vini veshin! 

Por nuk është aq halli se si e mendon marrjen e pushtetit Noka me skenat e ikjes së Ramës prej Kryeministrisë i tmerruar nga protestat e papara në gjithë Europën Juglindore, pasi çdo forcë politike ka brenda vetes ekzemplarë të tillë, edhe në nivelet e larta; halli është kur sheh se atij i është besuar flamuri i kredos politike në PD, zëri e leksiku bazë i saj, duke e bërë gjithnjë e më të munguar atë përfaqësimin potent, të besueshëm e serioz, që përçon në popull reflektim mbi çfarë nuk u bë mirë në qeverisje e një vizion të reformuar për të ardhmen me plot besueshmëri, që shkon paralel me një mendim opozitar të pjekur. Nëse ka vend që PD-ja të kthehet pas në kohë, kjo është ajo kohë kur vlera e lidershipit të saj ishte në ato nivele intelektuale, sa Flamurin e rendisnin tek personat “dru me pre”, për të furnizuar realisht me dru sobat e zyrave të PD-së së asaj kohe, në kohë të ftohta.