Gjyqtarët, fundjava luksi. Majko: I pashë në avion, shkonin të shikonin Bayernin në Mynih

Diskutimi i disa ndryshimeve në ligjin ”Për deklarimin dhe kontrollin e pasurive, të detyrimeve financiare të të zgjedhurve dhe të disa nëpunësve publikë”, u shoqërua me debate dhe batuta mes deputetëve të pozitës dhe opozitës në mbledhjen e Komisionit të Ligjeve. Deputeti i Partisë Socialiste dhe ish-kryeministri Pandeli Majko, duke mbrojtur amendimin e këtij ligji, që lidhet me funksionimin e Inspektoriatit të Lartë të Deklarimit dhe Kontrollit të Pasurive (ILDKP), e konsideroi çështjen e deklarimit të pasurisë së zyrtarëve si një nga problemet më të manipuluara në Shqipëri. “Në takimet në Qendrën Marshall, ku folëm me ekspertët më të mirë të çështjeve të antikorrupsionit, dëgjuam me qindra studentë që kishin ardhur aty dhe që e trajtonin problemin e korrupsionit dhe të trafiqeve në Shqipëri si problemin më kryesor në rajon. Njerëz shumë të ditur atje na thanë që korrupsioni në Shqipëri është korrupsion sistemik, që do të thotë se ka prekur sistemin. Tani, nëse ne flasim për korrupsion sistemik, ILDKP për çfarë është ngritur? Ne synojmë ta forcojmë dhe ta sofistikojmë ILDKP-në përmes ndryshimit të ligjit”, tha Majko.

Rasti Majkos

Në vijim ai solli një tjetër rast konkret, lidhur me një udhëtim drejt Mynihut. “Ju e dini shumë mirë. Ishim duke shkuar në Mynih, bashkë me ne ishin dhe gjykatës që kishin prerë biletën për të parë ndeshjen e Bajernit. Më falni miqtë e mi. Të gjithë ne kemi këto rroga që kemi, ju del juve të blini biletën dhe të shkoni të shikoni ndeshjen?! Ju del ju të bëni gallatë me të ardhurat tuaja dhe të shkoni të shikoni ndeshje?! Ne kemi krijuar një elitë të korruptuar në zemër të Shqipërisë dhe shtetit tonë ligjor i ka mbetur vetëm L-ja. Prandaj, o do e bëjmë, o do i themi shko për lesh”, u shpreh Majko. Duke kundërshtuar qëndrimet e opozitës, që pretendojnë se ndryshimet në ligjin për ILDKP-në prekin kompetencat e Presidentit të Republikës, deputeti i PS-së më parë kërkoi nga Kreu i Shtetit që të mbrojë nderin e Forcave të Armatosura, përballë akuzave të PD-së për implikim të ushtrisë në trafikun e lëndëve narkotike. “Keni dy javë që ngrini problemin e trafikut të drogës nga bazat ushtarake. Presidenti është Komandant i Përgjithshëm i FA-së. Kur e ka mbledhur Këshillin e Sigurisë? A ka ndonjë reagim Komandanti i Përgjithshëm për të mbrojtur nderin e FA-së, a i ka thirrur ministrat, shefin e shërbimit e t’u kërkojë llogari, apo e keni për të bërë ‘qoka’ dhe për të dhënë intervista”, pyeti Majko deputetët e opozitës në komision.

PANDELI MAJKO: Si ta forcojmë ILDKP ta kthejmë në një antivirus për këtë korrupsion sistematik. Problemi i deklarimit të pasurisë është një nga problemet më të manipuluara në Shqipëri.
GENT STRAZIMIRI: Unë do të thoja që nuk është antivirus sepse nuk po injektojmë gjë në shoqëri në këtë mënyrë. Ne po përpiqemi në një farë mënyre të kemi një dac që e kemi lënë të mbajë larg minjtë, ka 11 vjet që daci shkon jashtëzakonisht mirë me minjtë.
PANDELI MAJKO: Ju e dini shumë mirë. Ishim duke shkuar në Mynih. Bashkë me ne udhëtonin edhe gjykatës që kishin prerë biletë për të parë ndeshjen e Bajernit. Më falni miqtë e mi! Të gjithë ne kemi këto rroga që kemi, por a u del ju që të shkoni dhe të bëni gallatë me të ardhurat tuaja?! Të shkoni të shikoni ndeshjen?!
GENT STRAZIMIRI: Gjyqtarët dhe politikanët që kanë nga tre shtëpi, një vilë të madhe në mes të Tiranës, një më të madhe ne plazh dhe një tjetër në mal, të jeni të bindur që iu del hesapi me pre biletën dhe të shkojnë të shohin ndeshjen në Mynih. Nuk janë vetëm gjyqtarë dhe prokurorë, janë politikanë të lartë, janë politikanë të ekzekutivit kryesisht. Marrin të gjithë certifikatën e virgjërisë tek ILDKP, se deri më tani asnjë nuk ka dalë, i përflasim, i përflasim, kurrë nuk ka prova,
kurrë nuk shkon njeri para drejtësisë.
PANDELI MAJKO: Ne kemi krijuar një elitë të korruptuar në zemër të Shqipërisë dhe shtetit tonë ligjor i ka mbetur vetëm ‘L’-ja prandaj o do e bëjmë os do t’i themi shko për lesh gjithë kësaj historie!
GENT STRAZIMIRI: A kemi bërë gjë deri më tani, përsa kohë e pati Presidenti? Jo. Por sigurisht nëse ja jep Kryeministrit dhe ja jep ekzekutivit dhe mazhorancës të jeni të bindur që nuk ka për të patur asnjë rezultat. Kjo është rruga më e mirë për të dekapituar shtetit dhe institucionalizuar korrupsionin.
PANDELI MAJKO: Keni dy javë që ngrini problemin e trafikut të drogës nga bazat ushtarake. Presidenti është Komandant i Përgjithshëm i FAsë. Kur e ka mbledhur Këshillin e Sigurisë? A ka ndonjë reagim Komandanti i Përgjitshëm për të mbrojtur nderin e FA-së, a i ka thirrur ministrat, shefin e shërbimit e t’u kërkojë llogari, apo e keni për të bërë ‘qoka’ dhe për të dhënë intervista?
EDI PALOKA: Nuk dyshon në ndjesitë e deputetit Majko për çështjet e korrupsionit, por, sot (dje) nuk jemi mbledhur për t’i dhënë “dërmën korrupsionit”, siç do të shpresonim të gjithë, por jemi mbledhur, duke shfrytëzuar disa propozime që ka bërë ILDKP, “për t’i dhënë dërmën” jo korrupsionit, por Presidentit. Kjo, ka vetëm një qëllim dhe kjo pjesa e show-t se do të luftojmë korrupsionin dhe nuk do lejojmë gjyqtarët që të shohin ndeshje, se ata do t’i shohin ato dhe mund të bëjnë dhe
më tepër se aq, por të jeni të bindur se korrupsioni nuk luftohet duke i hequr kompetencat presidentit, përkundrazi.
OERD BYLYKBASHI: Duhet që institucionet ligjzbatuese të forcojnë zbatimin e ligjit që ato kanë, se sa të ndryshohet vazhdimisht sepse bëhen edhe ato jo efikase. Duke lënë mënjanë këtë pjesë, sigurisht e gjitha kjo, ose po shfrytëzohet propozimi që vjen nga ILDKPKI për të bërë atë që ekzakt kërkon të bëjë mazhoranca, të kapë totalisht, edhe me ligj kontrollin e ILDKPKI-së, ose në mënyrë fare qesharake po përpiqet që të tërhiqet fokusi nga ajo që është e vërteta. Pikërisht, kontrolli politik, por me ligj i ILDKPKI-së.
VASILIKA HYSI: Nëse ne duam që të forcojmë rolin e këtij institucioni, ne duhet të forcojmë instrumentet e kontrollit që duhet të ketë ILDKPKI. Në këtë kuadër, unë do të sugjeroja z.Kryetar që të kalonin nen për nen dhe aty mund të bëjmë të gjitha diskutimet, ta përmirësojmë. Hajde të bëjmë dhe ndryshime të tjera për ta forcuar këtë institucion dhe të
bëhemi promotorë të kësaj lufte ndaj korrupsionit.