Kapet grupi që dyshohet për sulmet me tritol në Fushë Krujë (FOTO)

Në fillim kanë hedhur një sasi eksplozivi në derën e Komisariatit të Fushë-Krujës, me qëllim që të çorientonin policinë në kontrolle dhe aksion, për të realizuar trafikimin e ngarkesës me tritol. Por duket se plani i grupit kriminal ka dështuar edhe fal filmimeve të kamerave të sigurisë, që pasi janë krahasuar me të parat, kanë çuar agjentët tek emrat e të dyshuarve. Jo vetëm është goditur grupi i dyshuar, por janë sekuestruar edhe 30 kilogram tritol i ndarë në 100 kallëpe të gatshme për trafikim.

Dy prej personave u arrestuan, një u shoqërua (në foton kryesore), ndërsa tre të tjerë u shpallën në kërkim nga policia vendore. Në operacion morën pjesë mbi 100 forca të policive Krujë, Fushë-Krujë dhe Durrës, ndërsa u mbështetën edhe nga FNSH-të. Burime zyrtare njoftuan se pas operacionit të koduar “Detonatori”, ndaluan në orët e para të mëngjesit të dyshuarit Dorjan Picorri, 28 vjeç, Sajmir Ajazi, 34 vjeç, shoqëruan Redi Ndreun, 30 vjeç, banues në Krujë, ndërsa tre u shpallën në kërkim dhe emrat e tyre nuk u bënë publik. Policia bëri me dije se ky grup dyshohet edhe si përgjegjës për atentatet me eksploziv ndaj Komisariatit dhe institucioneve vendore gjatë katër muajve të fundit.

Shkak kanë qenë jo vetëm hakmarrja për aksionet policore, por edhe krijimi i kaosit dhe pasigurisë për të ushtruar aktivitetin e paligjshëm. Për të humbur gjurmët, 6 të rinjtë mësohet se ishin zhvendosur nga Kruja me banim në zonën e Tiranës. Por shkonin shpesh në Krastë, ku edhe kryenin veprimtarinë e paligjshme të trafikut të eksplozivit. Mbanin lidhje me furnizues të lëndëve plasëse dhe blerës, për qëllime të ndryshme. Kurse nga situata e pasigurisë përfitonin, duke kryer aktivitet nën hundën e policisë, që i është dashur të merret me hetimin e sulmeve.

Një sasi eksplozivi u hodh mbrëmjen e së premtes, rreth orës 22:00, në derën e pasme të Komisariatit të Fushë-Krujës, pjesa e oborrit të brendshëm, fatmirësisht pa shkaktuar të lënduar. Sipas hetimeve të kryera, rezulton se dy prej të rinjve kanë pasur si plan sulmin e komisariatit, kurse të tjerët do shfrytëzonin kaosin për të kaluar lëndën plasëse nëpërmjet rrugëve dytësore drejt Tiranës. Policia tha se sekuestroi ngarkesën në fjalë në një makinë në zonën e Krastës. Ndaj Komisariatit Fushë-Krujë kanë ndodhur edhe dy sulme të tjera me eksploziv më 20 janar dhe 3 mars të këtij viti, me dëme materiale në makinat e policisë dhe të bllokuara. (Foto: Pamje nga materialet e bllokuara)