Naço: Rrëfej KLD-në nga brenda

Intervistoi Habjon Hasani

 Problemin më kryesor që reflekton sot gjyqësori shqiptar, populli e ka identifikuar me kohë nëpërmjet thënies: “Kur ujkun e bëjnë bari”. Në një intervistë për DITA, ministri i Drejtësisë, Nasip Naço, në një mënyrë të detajuar ka shpjeguar disa nga shkeljet më flagrante, më spektakolare, të Këshillit të Lartë të Drejtësisë. Kanë bërë gjithçka që nuk duhej ta bënin, kanë bërë pikërisht të kundërtën e asaj që kanë për detyrë. Por si zgjidhet? KLD-ja është “Bariu” dora vetë. Ministri i Drejtësisë shprehet se qeveria shqiptare është në hapat e para të një reforme dhe do të ndërhyjë, por përmend një “vijë të kuqe” që sipas tij konsiston në mos cenimin e pavarësisë së pushtetit të tretë. Qëllimet e pathëna të KLD-së, termi korporatë si identifikues i gjyqësorit, roli i opozitës, por dhe orët e floririt janë aspekte të trajtuara nga Naço në këtë intervistë. A është kthyer ky sistem në diçka më të fortë se vetë klasa politike dhe qeveria? Ministri e përjashton katërcipërisht këtë gjë, por…koha do e tregojë.

Zoti ministër, ju së fundmi keni bërë disa kërkesa pranë KLD-së, por dhe disa rekomandime pranë Prokurorit të Përgjithshëm në kuadër të përmirësimit të gjendjes së sistemit të drejtësisë. Është me rëndësi të dimë, ju si Ministër Drejtësie, si i shikoni këto rekomandime tuajat, si një hap që do mund të përmirësojë aspekte të veçanta, apo si hapa që zgjidhin probleme themelore, strategjike, të sistemit gjyqësor?

Si fillim unë do të doja të ndaja me ju disa probleme që sjellin shqetësime sot në sistemin e drejtësisë. Probleme të evidentuara çdo ditë edhe nga qytetarët, të cilët e provojnë çdo ditë këtë sistem për mënyrën si funksionon, probleme të provuara edhe nga organet ligjzbatuese por dhe partnerët tanë ndërkombëtarë. Më së pari është perceptimi mbi korrupsionin për sistemin gjyqësor në veçanti. Në raportin e fundit të “Transparency International” ne jemi renditur në vendin e 116, kemi rënie të nivelit, pasi një vit më parë renditeshim në vendin e 113. Pra jemi në përkeqësim, si në sytë e partnerëve dhe në perceptimin e qytetarëve. Neve aktualisht në bazë të këtij raporti jemi të krahasueshëm me vende si Laosi apo Kamboxhia. Pra jemi i vetmi vend në Evropë që për nga standardet jemi shumë larg, kemi ‘dalë’ jashtë kontinentit tonë. Metastazat e këtij korrupsioni janë shtrirë në të gjithë administratën, në të gjithë sistemin, qeveria më shumë ka luftuar me slogane të tipit “Tolerancë Zero”, por realisht nuk e ka luftuar këtë fenomen. Me marrjen e detyrës së ministrit të Drejtësisë, sigurisht bazuar dhe në programin qeveritar, kemi konstatuar dhe disa fenomene të cilat më së pari unë do i rendis dhe më pas, do parashtroj dhe mënyrën se si ne mendojmë se do i zgjidhim.

Do e filloj me gjendjen që kam gjetur. Që në ditën e parë të punës si ministër i Drejtësisë, kam konstatuar se në 30 gjykata të Shqipërisë, vetëm 7 kryetarë gjykatash ishin të emëruar. Pjesa tjetër, në kundërshtim të plotë me vendimin e KLD-së, por dhe me ligjin, vazhdonin të ishin në krye të gjykatave jo vetëm për 3 muaj, siç ligji e parashikon, por vazhdonin detyrën që prej 3-4 vitesh apo dhe mbi 5 vitesh.

 Zoti ministër, ky moment është shumë i rëndësishëm. Kush mban përgjegjësi për këtë situatë?

 Po sigurisht që Këshilli i Lartë i Drejtësisë mban përgjegjësi.

 Po në ç’mënyrë e mban këtë përgjegjësi?

 Është përgjegjësia e një mungese të theksuar efiçence dhe integriteti. Por më lejoni të vazhdoj me renditjen e problematikës si fillim. Problemi i dytë që unë konstatova si anëtar i KLD-së, pashë që një pjesë e mirë e gjyqtarëve të Gjykatës Administrative e cila filloi punën më 4 Nëntor, nuk ishin të emëruar. Çka do të thotë se nuk ishte respektuar dekreti i Presidentit të Republikës, për riorganizimin e gjithë sistemit. Për pasojë, sot në disa gjykata ka disa gjykatës mbi organikë dhe nuk marrin dot as pagat. Kjo është shumë e rëndë, për KLD-në, çka tregon qartë, mungesë efiçence, përgjegjshmërie dhe integriteti.

Gjatë mbledhjeve në KLD, kam konstatuar se ky Këshill nuk funksiononte sipas ligjit apo sipas vetë rregullores që e organizon punën e tij. Po gjej rastin të përmend disa emërime që në vlerësimin tim nuk janë bërë në përputhje me ligjin. Konstatova se ishin 16 magjistratë, të cilit kishin përfunduar të gjitha kualifikimet dhe prisnin për t’u futur në rendin e ditës së punës së KLD-së, por KLD-ja nuk i fuste në rendin e ditës kur këta magjistratë rrinin në shtëpi dhe paguheshin sipas ligjit pa bërë asnjë lloj pune në një kohë që sistemi ka shumë nevojë për një brez të ri të arsimuar dhe të formuar siç duhet. Logjika e kësaj vonese ishte shumë e thjeshtë. KLD-ja priste që vendet e mira, në Tiranë apo diku tjetër, të kapeshin nga gjyqtarë të ardhur nga rrethet dhe pasi të ndodhte kjo këta magjistratë do delegoheshin nëpër rrethe.

Ju çfarë kini bërë pasi konstatuat këto situata?

Kur jam njohur me kërkesën e tyre i kam propozuar KLD-së për t’i futur në rendin e ditës dhe për t’i emëruar në Gjykatën e Tiranës, për të paktën 12 magjistratë, çka do të ndikonte ndjeshëm dhe në frymën e kësaj gjykate. Por unë përfaqësoj vetëm një votë në KLD dhe ky Këshill përbëhet nga 15 anëtarë ku 9 prej tyre zgjidhen nga Konferenca Gjyqësore. Ishin po këta gjyqtarë por dhe të tjerë që nuk e pranuan propozimin e ministrit të Drejtësisë, nuk e futën në rendin e ditës, nga ana tjetër vendet në Gjykatën e Tiranës i zunë gjyqtarë të ardhur nga rrethet, disa prej të cilëve plotësonin kritere fare minimale, ndërsa një pjesë tjetër ishin jashtë çdo lloj kriteri.

KLD-ja ka marrë një vendim që Gjykatën e Tiranës e quan “gjykatë karriere”. Shkolla e Magjistraturës në këto vite ka nxjerrë rreth 150 gjyqtarë, me një formim shumë të mirë, të kualifikuar siç duhet, por që nga KLD-ja nuk u pranuan pasi me sa duket e kishin mbledhur mendjen për të bërë qokën e radhës për ata që kishin premtuar.

Nga ana tjetër në disa gjykata Apeli, emërimet nuk janë bërë në përputhje me ligjin dhe konstatova se nuk ishte hartuar ende një sistem vlerësimi i përfunduar, ky sistem ka përfunduar në mos gaboj në muajin janar 2014. Sigurisht që të gjitha emërimet që janë bërë, kanë ndodhur në kundërshtim të plotë dhe të hapur me ligjin. Nuk kemi pasur një sistem pikëzimi dhe karriere për të gjithë gjyqtarët. E kam evidentuar si fakt që në ditët e para, kam kërkuar që të bëhet ky sistem pikëzimi, por pasi i kanë mbaruar të gjitha emërimet, sot është shpallur ngritja e këtij sistemi në faqen elektronike të KLD-së. Por kanë ngelur shumë pak vende tashmë për t’u bërë emërime.

Një tjetër rast që vlen të përmendet është ai për emërimin e Ish-Kryeprokurores së Përgjithshme, Ina Rama e cila pas përfundimit të detyrës, në përputhje me ligjin, duhej të emërohej. KLD nuk fuste prej një viti në rendin e ditës kërkesën e saj….

Pasi ajo më nisi kërkesën e saj, në përputhje me ligjin i kërkova KLD-së për të futur në rendin e ditës dhe këtë çështje. Herën e parë ma refuzuan me pretekstin se kërkesën nuk e kisha bërë 48 orë para mbledhjes por e kisha bërë 45 orë përpara. Pra për 2-3 orë vonesë e refuzuan propozimin tim herën e parë. Zonja Rama dha argumente logjike dhe ligjore mbi pretendimet dhe situatën e saj por asnjëra prej tyre nuk u mor parasysh nga KLD-ja.

Ky Këshill ka filluar dhe promovon vetveten. Kreu i Shkollës së Magjistraturës i cili ka qenë anëtar në këtë Këshill. Një tjetër rast ishte me vendin vakant të Gjykatës së Apelit në Tiranë, në të cilin KLD donte të emëronte një anëtar, të saj por falë dhe sensibilizimit të partnerëve ndërkombëtarë pranë Presidentit, ky i fundit e la në heshtje këtë çështje dhe nuk e dekretoi.

 Për cilin gjyqtar është fjala konkretisht?

 Pa dashur të personalizoj me emra, bëhet fjalë për një nga anëtarët e KLD-së, që është gjyqtar në Gjykatën e Tiranës dhe kërkonte kalimin në Gjykatën e Apelit. Apo një rast tjetër kur një anëtar i KLD-së, ka ardhur nga një rreth tjetër në Gjykatën e Tiranës. Pra kemi një promovim të vetvetes në kundërshtim të plotë me ligjin. Rastet e shkeljeve janë të shumta. Këtu dua të përmend edhe procedimet, numri i procedimeve të bëra nga unë si ministër në këto 4 muaj, është i njëjtë me numrin e procedimeve të bëra në 4 vitet e shkuara. Gjyqtarë me probleme serioze gjatë punës së tyre, kur janë proceduar, jo vetëm që nuk janë futur në rendin e ditës së mbledhjeve të KLD-së, por përkundrazi janë promovuar deri dhe duke i bërë kryetarë gjykatash.

 Zoti ministër, ju keni renditur një sërë problemesh dhe çështjesh, që në totalin e tyre, flasin për një papërgjegjshmëri ekstreme të KLD-së gjatë ushtrimit të funksionit të saj. Ju jeni anëtar i KLD-së, jeni aty në tavolinë në çdo mbledhje. Nga ajo që ju keni kuptuar, si mendoni, kjo gjendje është krijuar sepse në KLD anëtarët janë leshko dhe të papërgjegjshëm, apo këta njerëz kanë intencione?

Unë mund t’u them se ka një mungesë efiçence të theksuar, mungesë përgjegjshmërie dhe integriteti.

 Është me rëndësi të dorës së parë të dimë mendimin tuaj, nëse këtë mungesë papërgjegjshmërie e kanë nga paaftësia apo kanë qëllime këta njerëz?

 Unë vlerësimin tim e dhashë, mungesë efiçence, përgjegjshmërie dhe integriteti.

Dua të di perceptimin e ministrit të Drejtësisë të këtij vendi. Sipas jush këta anëtarë të KLD-së nuk e kuptojnë, nuk janë koshient se çfarë janë duke bërë, apo kanë ndonjë plan? Është me rëndësi absolute ta dimë këtë gjë prej jush zoti ministër…

 Për të ruajtur etikën time si ministër, përdor shprehjet që ju thashë. Sepse kaq e kam informacionin.

Po perceptimin si e keni?

 Për pjesën tjetër ju mund t’i drejtoheni dhe Presidentit të Republikës, i cili në Konferencën Gjyqësore, midis të tjerave ka deklaruar, po përpiqem ta citoj sa më korrekt, ka deklaruar se një pjesë e gjyqtarëve nuk e nisin punën në mëngjes pa pritur zarfin e avokatit, prokurorit apo qytetarit. Pra, është një perceptim i kreut të KLD-së, i Presidentit të vendit dhe unë besoj që me detyrën që ka, ai ka informacionin e nevojshëm. Besoj se në këtë pikë, ndoshta konvertoj bashkë me Presidentin e Republikës për një pjesë të këtyre gjyqtarëve.

Zoti ministër, ju renditët fakte shumë të rënda mbi funksionimin e KLD-së. Është me interes të dimë, do mbetemi duke u numëruar bëmat neve këtyre njerëzve, apo do ketë ndërhyrje për zgjidhje?

Sigurisht që kjo është pjesa e konstatimit. Në çdo rast kam kërkuar që bashkërisht me KLD-në të ndërmerrnim reforma, të ndryshonim gjendjen në KLD.

 A është paradoksale kjo që sapo thatë zoti ministër. Nëse KLD-ja është në këtë lloj derexheje, pra është vetë problemi, si mund t’i kërkosh partneritet për zgjidhje?

 Ky është sistemi që kemi. Ky është sistemi që po na zvarrit prej vitesh, ky është dhe perceptimi i publikut. Në emër të qeverisë shqiptare unë i kam kërkuar Komisionit të Venecias për të ardhur e për të na asistuar në pjesën më të madhe të reformave që ne duam të bëjmë. Ne nuk e kemi fshehur faktin se duam të reformojmë Gjykatën e Lartë, Kushtetuesen dhe KLD-në. Për këtë presim shumë shpejt që të jetë prezent në Shqipëri dhe misioni EURALIUS-4. Ministria e Drejtësisë disa kohë më parë, ka krijuar dhe një grup këshillimor me ekspertët më të mirë të fushës, siç janë ish-prokurorë të Përgjithshëm, ish-ministra të Drejtësisë, anëtarë të Gjykatës së Lartë, prokurorë, pedagogë dhe avokat tejet të njohur, etj. Ky grup këshillimor do ketë një rol tepër pozitiv për të gjithë ligjet që do hartojë ministria e Drejtësisë.

 Zoti ministër dua t’iu bëj një pyetje shumë konkrete. Është me interes të dimë çfarë mendon qeveria e Shqipërisë për këtë KLD të dalë jashtë kontrollit. Mendon se ndërhyrja duhet bërë akute dhe menjëherë? Apo mendon se kjo punë pret?

Qeveria shqiptare në asnjë rast nuk kërkon të kalojë atë vijën e kuqe që shkel pavarësinë e sistemit gjyqësor. Ky është parim shumë i rëndësishëm për një vend demokratik. Që do të thotë që jemi të detyruar në çdo rast të respektojmë ligjin dhe vetëm ligjin.

 Zoti ministër, faktet që ju parashtruat më lart, tregojnë se kjo KLD përveç vijës së kuqe ka tejkaluar dhe ‘ylberin’. Si do e gjeni zgjidhjen?

Po flasim për qeverinë e dalë nga zgjedhjet e 23 qershorit me një mazhorancë të konsoliduar, që në çdo moment mund të ndryshojë të gjitha ligjet e këtij vendi. Nuk ka qenë ky qëllimi, duket sikur mazhoranca është e plogësht, sikur nuk e ka vullnetin për të bërë reforma.

Në fakt kështu po mendon dhe publiku për mazhorancën zoti ministër…

Nuk është aspak e tillë. Unë ju thashë pak më parë se të gjitha reformat të mos i bëjmë vetëm por me partnerët tanë ndërkombëtarë, por t’i bëjmë dhe me opozitën. Me opozitën ne ndahemi vetëm në një pikë, tek taksat, të cilën opozita e kërkon të sheshtë, ndërsa ne jemi për atë progresiven. Për pjesën tjetër është në interes dhe të opozitës, për të bërë reforma dhe për të nxjerrë produkte që do i shërbejnë shoqërisë shqiptare. Këtu nuk është çështja për të hequr 10 gjyqtarë e për t’i zëvendësuar me 10 të tjerë. Sepse po të ishte për këtë ne mund ta kishim bërë që në shtator.

 Me siguri që nuk jemi duke folur për punë individësh por ama po flasim për një reformë rrënjësore Kushtetuese, apo jo?

Pikërisht pra. Në çdo rast qëllimi jonë ka qenë që të reformojmë sistemin. Kemi filluar dhe kemi bërë disa ndryshime të shpejta në Kodin e Procedurës Penale që kanë të bëjnë me imunitetet e zyrtarëve të lartë. Gjithashtu në ligjin “Antimafia” kanë hyrë dhe 6 vepra penale, që lidhen me korrupsionin. Që do të thotë se duke nisur që nga Presidenti i Republikës, Kryeministri, deputetët etj, prokurorët do u kontrollojnë pasurinë, atyre dhe të afërmve të tyre. Pra në njëfarë mënyre është ngushtuar laku për të gjithë zyrtarët. E gjitha kjo bëhet për të dekurajuar në çdo rast korrupsionin. Ju doni që unë të vij tek KLD-ja. Ne kemi kërkuar që të përcaktojmë qartësisht kompetencat që ka Inspektoriati i KLD-së, në raport me inspektoriatin e ministrisë së Drejtësisë. Të mos shmangim asnjërin prej inspektorateve.

Është vërtetë çështje inspektoratesh zgjidhja zoti ministër? Me Inspektoriate dilet nga kjo situatë?

 Situata është komplekse dhe secili aktor ka rëndësinë e vetë.

Zoti ministër, ju vetë renditët disa shkelje arbitrare, të rënda të KLD-së. Inspektoriati ku ka qenë gjithë këtë kohë? Me se merrej Inspektoriati që nuk dallonte dot shkelje kaq flagrante? Si mundet që këtyre Inspektoriateve t’u besohet rol parësor në reformë?

Mendoj se çdo institucion ka rëndësinë e vetë. Është shumë i rëndësishëm dhe inspektorati i KLD-së por edhe ai i ministrisë së Drejtësisë. Këto inspektorate nuk duhen mbivendosur por duhen harmonizuar. Njëra ndihmon tjetrën. E dyta ne kemi nisur një sistem vlerësimi, i cili deri më sot nuk ka funksionuar siç duhej. Ne kemi nxjerrë një draft pune për të gjithë gjyqtarët, ku përcaktohen me ligj mënyra dhe kriteret e vlerësimit të një gjyqtari. Kjo synon që çdo gjyqtar të bëhet Zot i karrierës së vetë. Nëse punon mirë dhe respekton ligjin, do e ketë shumë të lehtë të promovohet. E nuk do ngelet më peng i disa inspektorëve të KLD-së apo dhe anëtarëve të KLD-së.

Vlerësimi dakord, por në fund vendimin prapë KLD-ja e merr, apo jo?

 Ua thashë dhe pak më parë që kanë ndodhur shumë shkelje me emërimet e fundit. Por gjërat nuk mbarojnë këtu. Ta dinë mirë dhe ata që janë emëruar në kundërshtim me ligjin, se sistemi do përmirësohet dhe do jenë çdo ditë nën vëmendje.

 Zoti ministër, ju jeni një jurist i vjetër dhe me eksperiencë. Dua të di, kur ju i merrni në analizë me veten tuaj këto shkelje të KLD-së, dalloni ndonjë element të shpërdorimit të detyrës?

 Të jeni mëse i bindur se nëse do konstatoj se një anëtar i KLD-së shkel ligjin në mënyrë të qëllimshme, jo për shkak të perceptimit të tij, por në mënyrë të qëllimshme, nuk do nguroj për të bërë dhe kallëzimin përkatës për shpërdorim detyre.

 Mbajtja peng e kupolës së gjykatave me qëllim që dikush të emërohet më pas kryetar në atë gjykatë a është shpërdorim detyre? A është pengmarrje e institucionit kjo?

Unë kam hedhur hapin e parë ku kam denoncuar këto zhvillime. Tani kërkoj hapin e dytë për të përcaktuar një mbledhje, qoftë për procedimet disiplinore, qoftë për fryrjen e organikës në disa gjykata.

 Po nëse KLD nuk e fut në rendin e ditës kërkesën tuaj, çfarë do bëni?

Do përdor të gjitha mjetet e duhura ligjore. Do i kërkoj mazhorancës dhe partnerëve tanë ndërkombëtarë, që të ndërhyjë në të gjithë sistemin.

 Po prokuroria ka tagër të hetojë në këto aspekte që ju renditët si shkelje të KLD-së?

Unë mendoj se kur shkeljet janë të karakterit administrativ nuk është e nevojshme të ndërhyjë prokuroria.

 Prokuroria ndërhyn në rastet kur ka shpërdorim të detyrës apo jo?

Nëse do konstatojmë raste të tilla sigurisht që duhet të ndërhyjë prokuroria, qoftë me iniciativë apo qoftë me nismën e një prej anëtarëve të KLD-së.

Ju si mendoni zoti ministër, pengmarrja, mbajtja peng e funksionimit normal të punës të disa gjykatave a është shpërdorim i detyrës?

 Unë nuk mund të dal dot tani në këtë konkluzion. Nuk e kam informacionin e nevojshëm, sot që po flasim, për ta konsideruar të tillë.

Zoti ministër ju pak më lartë thatë se synoni dhe bashkëpunimin me opozitën për të bërë reformën. Si mendoni, kjo opozitë do ulej me kënaqësi të madhe në tavolinë me ju për të bërë reformën, ndërsa kurban i reformës do ishte kjo KLD që opozita e mbron fanatikisht?

 Unë mendoj se opozita e mori një mësim nga zgjedhjet e 23 Qershorit dhe një nga shkaqet për mendimin tim ishte se nuk funksionoi siç duhej sistemi gjyqësor. Besoj që do të dijë të mbështesë reformat. KLD s’mund të jetë pronë e kësaj mazhorance apo i asaj të djeshmes. Në çdo rast ne kemi mazhorancë të konsoliduar, reformat do bëhen.

 Me ose pa opozitën?

 Do dëshiroja në çdo rast që të gjitha reformat që kanë të bëjnë me sistemin e drejtësisë, minimumi të merrnin 139 vota nga 140 që ka gjithë parlamenti.

 Po opozita ka dhe ca halle me drejtësinë. Ish-ministrin e Mbrojtjes e ka nën hetim. Disa dosje i ka të mbyllura me procedurë. Mund ta sakrifikonin ata këtë KLD-në duke qenë në këto kushte? Ju besoni se ata do tregoheshin kaq bujarë?

 Unë nuk mendoj se bëhet fjalë për një opozitë provinciale që mendon për kryetarin e bashkisë së radhës apo për kryetarin e një komune.

 Në fakt kjo KLD e sotme kaq provinciale, nga kjo opozitë është krijuar, apo jo?

 Unë nuk mendoj se opozita është kaq provinciale sa të mbajë peng gjithë vendin për interesa banale. Mendoj se sidomos në sistemin e drejtësisë ne duhet t’i bëjmë bashkërisht reformat.

 Kreu i Apelit të Tiranës, ka dorëzuar në KLD një material denoncues për anëtarin e KLD-së Gjin Gjoni. Ju jeni anëtar i KLD-së. Është me interes të dimë, çfarë menduat kur u njohët me këtë material. U habitët? U shokuat? Apo keni pasur dhe më parë aq të dhëna sa për të mos u shokuar?

Ish-ambasadori amerikan në Shqipëri, Uidhers, në një deklaratë tek Zëri i Amerikës, midis tjerave ka thënë që sistemi gjyqësor në Shqipëri është i vetë-diskretituar. Në mbledhjen e KLD-së nuk është diskutuar kjo letër dhe as përmbajtja e saj, por një nga anëtarët e KLD-së ka kërkuar që të zbatojë ligjin, pasi preket nga kjo letër dhe ka njoftuar se ka bërë dhe kallëzimet përkatëse. Kaq ka ndodhur në atë mbledhje.

 Zoti ministër kupola e gjyqësorit në Shqipëri, shpesh etiketohet nga politikanë por edhe operatorë mediatik me termin “Korporatë”. Është me rëndësi të dimë se çfarë mendoni ju për këtë etiketim. E gjeni naiv këtë etiketim? Keqdashës? Të ekzagjeruar? Apo korrekt?

Unë kam mbajtur fjalën time si ministër Drejtësie në Konferencën Gjyqësore Kombëtare dhe gjithë theksin e kam vënë tek KLD-ja. Në çdo rast kam kërkuar efiçencë përgjegjshmëri dhe integritet të KLD-së, e cila është qeverisja e gjithë sistemit gjyqësor.

Është Bordi Drejtues i Korporatës i bie?

Po ju them që është qeverisja e sistemit gjyqësor.

 A e meriton termin korporatë ky sistem drejtësie?

Unë mendoj se KLD-ja ka nevojë për efiçencë integritet dhe përgjegjshmëri.

Pyetja e fundit. Zoti ministër, duke e sfiduar këtë sistem drejtësie, a nuk keni ndonjëherë dilemën se ky sistem mund të rezultojë diçka më e fortë se ju? A mendoni se ata janë mjaftueshëm të organizuar sa për t’iu mundur juve?

Këtu nuk bëhet fjalë për nisma personale.

 Kur them “ju” presupozoj çdo tentativë për reformë nga ana e qeverisë shqiptare. E keni këtë dilemë se mund të dalin ata më të fortë?

 Absolutisht jo. Unë i besoj elitës politike shqiptare, i besoj gjyqtarëve më të mirë që ka sistemi, ne përfaqësojmë një vullnet të fortë të shqiptarëve të shprehur më 23 qershor, ne nuk jemi vetëm por kemi dhe partnerët tanë ndërkombëtarë, të gjitha reformat do i bëjmë sikur të ishim një vend anëtar i BE-së. Përballë këtij fronti të gjerë, ajo që ju e quani korporatë, është diçka fare e vockël .

Unë ju premtoj se në mbledhjen e ardhshme të KLD-së, ju nuk do gjeni më orë floriri, e bizhuteri, sepse sistemi ka filluar të funksionojë dhe do verifikohet çdo pasuri e tyre dhe e familjarëve të tyre. Unë kam bindjen se që këtu do nisë të funksionojë sistemi.