Kush do e gjykojë gjyqtarin?

Një lëvizje e Inspektoriatit të Lartë të Deklarimit të Pasurive (ILDKP) i ka dhënë dje një tjetër përmasë debatit publik  mbi degradimin e gjyqësorit dhe posaçërisht kubesë së tij, Këshillit të Lartë të Drejtësisë.

ILDKP-ja ka dorëzuar në prokurorinë e Përgjithshme një dosje me provat se anëtari i KLD-së, Gjin Gjoni ka fshehur një pasuri jo të vogël, por rreth 2.3 milionë euro.

Pasi ILDKP-ja njoftoi këtë lëvizje të saj, Gjin Gjoni, deklaroi se pasuria ishte e bashkëshortes së tij. Nga ana e saj ILDKP-ja, ka kallëzuar dhe bashkëshorten e Gjonit për falsifikim dhe fshehje pasurie por edhe dy noterë publikë, si bashkëautorë në prodhimin e akteve dhe dokumenteve të falsifikuara noteriale, që kanë mundësuar justifikimin e rremë të pasurisë së Gjonit. Pra hetimi ka nxjerr një zinxhir bashkëpunëtorësh të implikuar në skemë.

Nga ana tjetër, në fund të njoftimit të saj ILDKP-ja njoftonte se do të hetojë dhe vetveten, pasi këto të dhëna kishin vite që ishin deklaruar nga Gjoni por askush më parë, asnjë nga inspektorët e ILDKP-së nuk kishte bërë detyrën. Rrinë ashtu të pluhurosura dosjet e deklarimeve të pasurisë, pirg dhe ndoshta tek ky pluhur fshihet edhe zelli i ish-qeverisë për ta mbrojtur me dhëmbë ish-kreun e ILDKP-së me emrin  Zana. Njësoj si me dosjet që ndodhen sot në binxën e ILDKP, me qindra denoncime, hetime, denoncime për shkelje për gjyqtarë nga i gjithë vendi, i ka zënë pluhuri në KLD. Kjo e fundit po pretendon se është nën trysni dhe presion politik, por ama rezultatet e punës nuk i duken gjëkundi, përkundrazi, shkelje të rënda të këtij institucioni kanë dalë në dritën e diellit së fundmi.

Në një vend ku secili merr përgjegjësitë e veta morale dhe shoqërore Gjin Gjoni me siguri që do ketë shumë punë për të justifikuar dhe për të paraqitur argumente bindëse përpara prokurorëve sot dhe ndoshta përpara gjykatësve nesër, për të justifikuar këto kontrata të falsifikuara prej tij. Por pyetja që shtrohet sot nga opinioni publik shqiptar është:  Përpara cilët prokurorëve? Përpara cilëve gjykatës?

Shpresojmë se prokuroria ngitet në lartësinë e pritshmërie të publikut dhe mund ta dërgojë gjykatësin Gjoni në gjyq për fshehje pasurie dhe falsifikim. Por cilët gjykatës do ishin të denjë ta merrnin në shqyrtim një gjykatës?

Në çdo rast mund të gjenden kollaj gjykatës që janë më të varfër se ai, por është tepër…tepër e vështirë të gjesh sot, në sistemin e drejtësisë një trupë gjykuese që mund të ketë një tagër besueshmërie dhe integriteti sa për të gjykuar raste të tilla. Tashmë që po dalin të palarat e këtij sistemi,  ku thagmat më të mëdha gjenden pikërisht në krye të tij, në KLD, kuptohet qartë se z.Gjoni nuk është më një individ, një gjykatës i përveçëm; ai është sistemi, ka pakëz gjingjon në shumë gjykatës të këtij vendi tashmë. Edhe nëse nuk janë të implikuar si ai, janë mjaftueshëm të pa guximshëm sa për vite të mos pipëtinin mbi atë që po ndodhte dhe vazhdon të ndodhë.

Në këtë maskaradë ku ka precipituar gjyqësori, gjykimi i tij do ishte në çdo rast një shfaqje e përkryer mosbesimi absolut. Gjingjoni që gjykon Gjingjonin. Për të arritur deri këtu hetimi penal i prokurorisë duhet të funksionojë. Shpresojmë të funksionojë.

Që ky proces të mos kalojë në mënyrë sipërfaqësore duke linçuar dy ose tre gjyqtarë, që e meritojnë ndëshkimin, do të ishte më mirë që shumica të mendonte për një formë ligjore, për një reformë të thellë në drejtësi duke u nisur nga niveli i lartë i korrupsionit.

Një ligj i ri specifikisht për gjyqësorin, lidhur me hetimin një për një të pasurive të tyre, do të ishte një shans për të vendosur një standard në gjyqësor dhe për t’i ikur rrezikut të kalimit të kësaj situate me disa koka turku. Në këtë situatë, kur opinioni publik është në shumicë absolute i bindur se ky është një sistem i korruptuar, një nismë ligjore për të vendosur një standard për hetimin e 100 për 100 të gjithë gjyqtarëve dhe prokurorëve të Shqipërisë lidhur me pasuritë e tyre dhe të afërmve të tyre, do të ishte i mirëpritur dhe do të ishte po ashtu një bazë e mirë për të bërë reformën në drejtësi në bazë të rezultateve të këtij kontrolli.

Shqipëria është bërë një vend i frikshëm sa i përket jo vetëm pasurimit të gjyqtarëve dhe prokurorëve, por dhe arrogancës së tyre si njerëz të paprekshëm, të paturpshëm dhe të pandëshkueshëm. Një nismë ligjore, qoftë dhe në formën e task forcës, që do të bënte hetimin e plotë të gjtihë gjyqtarëve dhe prokurorëve të Shqipërisë, pa asnjë përjashtim, dhe publikimi i përfundimeve të saj, do të shërbente për të justifikuar ndryshime rrënjësore në drejtësi. Shumica i ka votat e nevojshme për të ndërhyrë për në nismë të tillë. Ndryshe rrezikojmë që këtë sensibilitet të opinionit publik, ndaj korrrupsionit në drejtësi, ta kalojmë me nja dy- tre koka turku dhe ca ora të shtrenjta “Cartier”, me të cilat mund të riblihet pafajësia. Drejtësia jonë ka nevojë për një shoshitje totale, nga i pari tek i fundit, mbi bazën e disa standardeve, që bëjnë të pranueshme figurën e njerëzve të drejtësisë. E keqja duhet shkulur nga rrënjët!

***

Inspektorati i Lartë i  Deklarimit dhe Kontrollit të Pasurive ka kallëzuar penalisht gjyqtarin e Gjykatës së Apelit Tiranë, Gjin Gjoni. Gjoni, njëkohësisht edhe anëtar i Këshillit të Lartë të Drejtësisë, akuzohet për falsifikim dokumentesh dhe deklarim të rremë të pasurisë.

Njëkohësisht, ILDKP ka ngritur kallëzim penal edhe ndaj bashkëshortes së Gjonit, Elona Çaushi, noteres Margena Çela, noteres Gentiana Shkodra për veprat penale të fshehjes dhe deklarimit të rremë të pasurisë në bashkëpunim, falsifikimit të dokumenteve në bashkëpunim, pastrimit të produkteve të veprës penale në bashkëpunim dhe korrupsionit.

 Të padeklaruara nga gjyqtari Gjoni janë në total: 1 842 796 euro, 180 mijë dollarë dhe 53 270 000 lekë

Njoftimi i plotë nga ILDKP:

Inspektorati i Lartë i Deklarimit dhe Kontrollit të Pasurive dhe Konfliktit të Interesave, bazuar në ligjin nr.9049, datë 10.04.2003,“Për deklarimin dhe kontrollin e pasurive, të detyrimeve financiare të të zgjedhurve dhe të disa nëpunësve publikë”, i ndryshuar, përfundoi kontrollin e plotë të deklaratave të interesave private të subjektit Gjin Gjon Gjoni, me funksion gjyqtar në Gjykatën e Apelit Tiranë dhe anëtar i Këshillit të Lartë të Drejtësisë.

Në përfundim të verifikimeve të kryera, mbi deklaratat e interesave private të subjektit Gjin Gjoni dhe bashkëshortes së tij Elona Çaushi, dhe të dhënave të siguruara gjatë proçesit të kontrollit të plotë, u konstatuan problemet si më poshtë vijon:

1. Falsifikim i kontratës Nr.384 rep, Nr.139 kol, të dt.20.03.2007, për shitjen e 70% të kuotave të aksioneve të kapitalit të shoqërisë “ADFD” sh.p.k, të hartuar me dy vlera të ndryshme, 70.000 lekë dhe 300.000 Euro, deklarim i rremë dhe mungesë burimesh financiare për shumat e mësipërme.

2. Deklarim i rremë në lidhje me burimin e krijimit të aseteve të deklaruara për shumën 300.000 Euro, paraqitja e dokumentave të falsifikuara dhe burim jo i ligjshëm.

3. Falsifikim i kontratave të huasë të dt.17.09.2007 në shumën 160.000 Euro, me afat 5 vjet, interes 5% (kthimi deri në Prill 2012) dhe të dt.22.04.2008 në shumën 138.888 Euro, me afat 5 vjet, interes 5% (kthimi deri në Prill 2013).

4. Deklarim i rremë dhe burim financiar jo i ligjshëm për kontratat e huasë dhënë shtetasit Werner Mehlber në shumën totale 298.888 Euro (160.000 Euro + 138.888 Euro).

5. Falsifikim të deklaratave No.2604 Reg. dhe No.2605 Reg. të datës 21.05.2010 për kthimin e shumës së huasë prej 60.000 Euro + 24.012 Euro interesa dhe 30.000 Euro + 13.896 Euro interesa nga shtetasi Werner Mehlber, pra gjithsej 127.908 Euro, pasi nga sistemi TIMS i Drejtorisë së Përgjithshme të Policisë së Shtetit, nuk rezulton që ky shtetas të ketë qenë në territorin e Republikës së Shqipërisë në këto data.

6. Deklarim i rremë dhe burim financiar jo i ligjshëm për deklaratat për kthimin e huasë nga shtetasi Werner Mehlber në shumën totale 90.000 Euro principal (60.000 Euro + 30.000 Euro), dhe 37.908 Euro interesa (24.012 Euro + 13.896 Euro), gjithsej 127.908 Euro.
7. Deklarim i rremë në lidhje me kontratën e sipërmarrjes Nr.1416 Rep, Nr.167 Kol, dt.24.04.2012 të vilës rezidenciale në Farkë, tip “Champagne”, në shumën 700.000 Euro.

8. Fshehje në vitin 2010 e aktivitetit si person fizik “Bar” me NIPT L01616024T, i bashkëshortes.

9. Fshehje në vitin 2012 e aktivitetit të shoqërisë “ALBCOS – Albanian Cosmetics” me NIPT L21309006C, ku shtetasja Elona Shpëtim Çaushi figuron të jetë administratore dhe ortake zotëruese e 100% të kuotave të kapitalit.

10. Fshehje në vitin 2012 e aktivitetit të shoqërisë “Prestige Group” me NIPT L21309007K, ku shtetasja Elona Shpëtim Çaushi figuron të jetë ortake zotëruese e 100% të kuotave.

11. Fshehje në vitin 2010 i aktivitetit të shoqërisë “Terra Toscana Alimantari” me NIPT L02214025H, ku subjekti dhe bashkëshortja Elona Çaushi janë ortakë me nga 50% të kuotave të kapitalit.

12. Deklarim i rremë dhe burim jo i ligjshëm i shumës prej 14.000 Euro të përfituara nga shitja e automjetit të deklaruar në pronësi të vëllait.

13. Falsifikim dokumentash dhe deklarim i rremë në lidhje me burimin e blerjes me kredi të automjetit tip Benz me vlerë 62.000 Euro në vitin 2010, pasi rezulton se në dt.20.04.2010 nga ana e subjektit i është likuiduar shoqërisë “Auto Star Albania” vlera totale e automjetit, ndërsa kontrata e kredisë me Landeslease sha. është lidhur në dt.23.04.2010, pra tre ditë më vonë.

14. Burim financiar jo i ligjshëm, i dyshimtë dhe pa dokumentacion ligjor justifikues për kontratat e blerjes të apartamentit në Tiranë me vlerë gjithsej 53.200.000 lekë, viti 2011.

15. Burim financiar jo i ligjshëm, i dyshimtë dhe pa dokumentacion ligjor justifikues për kontratat e sipërmarjes për apartamentet në Tiranë me vlerë gjithsej 176.080 Euro, viti 2008, të cilat më pas janë zgjidhur si kontrata dhe shuma 140.000 Euro është deklaruar si burim krijimi asetesh.

16. Burim financiar jo i ligjshëm, i dyshimtë dhe pa dokumentacion justifikues ligjor për apartamentin me vlerë 180.000 usd, viti 2010, i cili më pas deklarohet i shitur dhe shuma e mësipërme deklaruar si burim krijimi asetesh.

17. Burim financiar i dyshimtë për shpenzimet e padeklaruara për 109 dhe 127 hyrje–daljet nga territori i Republikës së Shqipërisë, përkatësisht i subjektit Gjin Gjoni dhe bashkëshortes së tij, shpenzime të cilat nga të dhënat paraprake dyshohet të jenë rreth 250.000 Euro.

18. Burim financiar i dyshimtë për të gjitha pasuritë e deklaruara në deklaratat e interesave private të subjektit Gjin Gjoni dhe bashkëshortes së tij Elona Çaushi.

Për arsyet e sipërpërmendura, bazuar në nenin 281 të K.Pr.Penale, ILDKPKI ka paraqitur kallëzim penal në Prokurorinë e Përgjithshme, duke kërkuar fillimin e proçedimit penal ndaj subjektit Gjin Gjoni, me funksion gjyqtar, anëtar i Këshillit të Lartë të Drejtësisë, bashkëshortes së tij Elona Çaushi, noteres Margena Çela, noteres Gentiana Shkodra për veprat penale të fshehjes dhe deklarimit të rremë të pasurisë në bashkëpunim, falsifikimit të dokumentave në bashkëpunim, pastrimit të produkteve të veprës penale në bashkëpunim, dhe korrupsionit parashikuar nga nenet 257/a e 25, neni 186 e 25, neni 287 e 25, neni 319/ç të Kodit Penal.

Përsa më sipër, bazuar në nenin 15 gërma “b”, neni 17 gërma “ç” të ligjit nr.9049, datë 10.04.2003 “Për Deklarimin dhe Kontrollin e Pasurive, të Detyrimeve Financiare të të Zgjedhurve dhe të disa Nëpunësve Publikë”, i ndryshuar, ILDKPKI do të njoftojë menjëherë Presidentin e Republikës, Kryetarin e Kuvendit, Këshillin e Lartë të Drejtësisë, Ministrin e Drejtësisë, Drejtorinë e Përgjithshme të Parandalimit të Pastrimit të Parave, Drejtorinë e Përgjithshme të Tatimeve për shkeljet e konstatuara.

Inspektori i Përgjithshëm ka urdhëruar nisjen e hetimit të brendshëm administrative për të nxjerrë shkaqet dhe përgjegjësitë që kanë bërë të mundur, që një çështje e tillë me prova të qarta të ardhura nga institucionet shtetërore, të mos ndjekë rrugën ligjore, por të mbyllet si e rregullt, pa probleme dhe në përputhje me ligjin.