Padia ndaj Gridës për mashtrim nxjerr histori të tjera

Një padi për mashtrim ka nxjerrë zinxhir shumë histori të tjera të lidhura me znj. Duma, ish-zv. ministre e Integrimit, zyrtare e Partisë Demokratike në opozitë. Shoqëria përmbarimore private ZIG ka filluar ekzekutimin e një vendimi gjykate në shumën 140 mijë euro për një kredi të pashlyer të marrë nga Grida Duma dhe partneri i saj, Roland Rexho.

Borxhe e sekuestrime

Përgjatë vitit 2013, Grida Duma ka paguar gjithë rrogën e saj në Ministri të Integrimit në favor të shoqërisë përmbaruese, duke iu lejuar vetëm shuma prej 8000 lekësh, që konsiderohet si minimum jetik. Megjithëse të ardhurat e saj reale kanë qenë kaq të ulëta, zonja Duma jeton në luks. Një kopje e listës së Thesarit të Shtetit, provon se ish-zëvendësministrja e Integrimit Grida Duma, e derdhte rrogën e saj në llogarinë e shoqërisë përmbaruese ZIG.

Ndërkohë një shkresë e dytë zyrtare provon se është nxjerrë në ankand një apartament që gjendet në pallatin që Duma e Rexho kanë ndërtuar. Bëhet fjalë për një apartament në emër të saj në adresën rruga “Nikolla Tupe” me sipërfaqe 118 metra katrorë.

Partneri i politikanes

Duma ka qenë partnere në biznes me Roland Rexhon, një biznesmen me origjinë nga Vlora. Ajo ka filluar biznesin me të në moshën 24-vjeçare, kur ishte në Durrës, ndërsa biznesmeni ndërtonte në Tiranë. Nuk dihet se ku i gjeti paratë për të investuar në ndërtim pallatesh një 24- vjeçare nga Durrësi, por fakti që biznesmenit në fjalë nuk i shkuan mirë punët dhe po shkonte drejt falimentimit, ka bërë që ajo të tërhiqet në vitin 2013 nga aksionet e saj, por ndërkohë ka detyrime për borxhet e krijuara nga kompania.

Padia për mashtrim

Duma dhe partneri i saj në biznes u paditën disa ditë më parë nga qytetari Albert Pali, 85 vjeç, për vjedhje dhe mashtrim. Të moshuarit pronar i një trualli ku Duma dhe partneri kanë ndërtuar një pallat, i ishin premtuar tri apartamente, të cilat nuk i janë dhënë. Pas 6 vitesh sorollatje, ku Duma e Rexho kanë ndërruar edhe celularët dhe adresën e selisë së firmës, Pali ka vendosur t’i drejtohet Prokurorisë. Një ditë pas publikimit të lajmit mbi padinë u mësua se Duma ka mashtruar edhe qytetarë të tjerë, pasi ka shitur të njëjtin apartament, tek dy klientë të ndryshëm. Dhe për më tepër e ka bërë në të njëjtën ditë. Kontratat e publikuara dje nga DITA , e provojnë këtë mashtrim, të certifikuar edhe nga një notere me emrin Luljeta Kongoli.

Faksimile e një kopje të listës së Thesarit të Shtetit, që provon se përgjatë vitit 2013, Grida Duma ka paguar gjithë rrogën e saj në  Ministri të integrimit në favor të një shoqërie përmbaruese, duke  iu lejuar vetëm shuma prej 8000 lekësh

* * *

Ku i fle lepuri Gridës

Redaksional

Nuk është se kërkohen kushedi çfarë cilësish intelektuale për t’u përfshirë në politikën shqiptare. Shumica e atyre që janë përfshirë në të dhe janë sot vendim-marrës politikë të këtij vendi, janë njerëz mediokër. Veç kësaj janë përgjithësisht të dhënë pas pushtetit dhe parasë në mënyrë gati kafshërore, nuk ka asgjë fine apo me stil në atë që bëjnë; shumë janë aty thjesht të mbrojtur bizneset e tyre ose për të marrë një licensë për të vjedhur. Nuk përfaqësojnë asnjë interes publik, “politika” e tyre edhe kur shpërndan vëmendje për të tjerët, shpërndan thjesht “vende pune”.

Asnjë projekt strategjik, asnjë synim afatgjatë, asnjë interes kombëtar. Pazare njerëzish të rëndomtë që duan të bëjnë jetë sheikësh, apo yjesh hollivudi, e që kalojnë në dramë nëse bëjnë një jetë thjesht normale. Shikojini si vishen të gjithë si top-modela mes një populli që mban të njëjtën garderobë derisa zbardhylet nga varfëria. Shikojini çfarë makinash të shtrenjta përdorin dhe ecin me to rrugëve që nuk janë në gjendje t’i bëjnë kurrë si duhen. Mjerim i madh historia e “klasës politike” të Tiranës.

Ndaj rasti “Grida” nuk habit. Jo rastësisht periudha në të cilën Dume është futur në telashe të tilla si këto që kemi treguar në DITA këto numrat e fundit, përkon dhe me “dëshirën e saj të zjarrtë” për t’u futur në politikë dhe për të qenë protagoniste e mbrojtjes së humbjes së thellë të Partisë Demokratike. Lepuri i Gridës fle gjetiu. Atje ku flenë shumë lepuj të tjerë të “politikës” së Tiranës.

Grida shpreson që politika të jetë mburoja e saj për të mos u trajtuar siç duhet trajtuar një mashtruese ordinere. Ja sa bukur deklaron që e sulmojnë sepse “do bëhet nënkryetare e PD-së”. Pra po i bëhet mender “sulm politik”. Nuk e ka menduar keq. “Kolegët” e saj “politikanë” të Shqipërisë, ia kanë hedhur paq edhe kur kanë bërë krime monstruoze. Dhe vazhdojnë t’ia hedhin.

Faksimile e shkresës zyrtare që provon se është nxjerrë në ankand një apartament që gjendet në pallatin që Dume e Rexho kanë ndërtua