Duan të dinë për Karl Marksin?

Letër e nënshkruar

Skënder Dusha

Fronti i turpit… Ose më mirë të themi fronti i karavidheve. Ku ishit ju ose ç’u bëtë ju efendilerë, kur Shqipëria po kalonte një provë shumë të rëndësishme, kur pushtetin e morën në dorë antikombëtarët, anarshistët, aventurierët, duke shkatërruar çdo gjë që ishte ndërtuar nga populli me gjak e me djersë, kur u mohua çdo gjë pozitive e krijuar deri atëherë, kur slogani i “çekut të bardhë” mori dhenë?

Tashti që populli shqiptar i përzuri shkaktarët e dramës së paparë ndonjëherë në historinë e Shqipërisë, pushtetin demokratik pluralist e morën të majtët e moderuar, të cilët s’kanë asgjë të përbashkët me partitë karagjoze që përfaqëson “aleanca” e tyre.

Në qoftë se zotërinjtë e kësaj “aleance” duan të dinë për Karl Marksin, le të pyesin kancelaren e Gjermanisë, znj.Angela Merkel, e cila ka dhënë 200 milionë euro për të treguar se si Marksi porosit që të ndërtohet biznesi, jo duke prerë para, por ndryshe.Enver Hoxha e mori pushtetin në një periudhë shumë të vështirë, kur varej ekzistenca dhe e ardhmja e pushtetit dhe si rezultat i politikës së tij në Luftën e Dytë Botërore, Shqipëria u njoh si shtet dhe më tej të mos mohohen sukseset e asaj politike. U bënë edhe gabime fatale që u kushtuan shumë vendit. Po si të mos bësh gabime me njerëz servilë deri në ekstrem si Sali Berisha me shokë, të cilët i kemi akoma në udhëheqje, si presidenti i nderuar, i cili në kohën kur u shkatërrua ushtria e lavdishme shqiptare, ishte sekretar shteti dhe të gjitha udhëzimet e mbrapshta i zbatoi një për një, ndërsa tani mban postin e komandantit suprem të ushtrisë që po krijohet.

Ju, zotërinj të “aleancës” së turpit, nuk e shikoni se ç’bëhet me Korenë e Veriut, me Kubën etj., ku udhëheqin vëllezërit tuaj siamezë? Ta dini që populli shqiptar s’ka për t’ju dhënë asnjë votë, se ju e treguat fytyrën e vërtetë në votimet e vitit 2011 për pushtetin lokal në Tiranë, kur u bashkuat me të djathtën kundër PS-së dhe bëtë që hajduti dhe krimineli Lulzim Basha të rrëmbejë postin e kryetarit të bashkisë së kryeqytetit.

Si nuk vutë mend nga partitë e Ballit Kombëtar dhe Legalitetit, të cilat, pothuajse në të gjitha zgjedhjet nuk kanë marrë asnjë deputet, se ata kanë marrë vulën e turpit dhe tani atyre ju bashkuat edhe ju.