Portokalli në…PD – Channel

‘Portokalli’ është pa dyshim një nga gjetjet më fantastike për të emërtuar një program, siç është ai humoristiku në Top Channel. Humori vetë si zhanër, ka brenda edhe të ëmblën dhe të hidhurën, siç dhe portokalli. E duke qenë i tillë, gjendet gjithnjë në një zonë të ndërmjetme, siç është ngjyra e këtij fruti në semafor, mes së kuqes për t`u ndalur dhe jeshiles për të ecur. Po ashtu, ‘Portokalli’ vlen gjuhësisht si në rastet kur theksin e ka tek zanorja e parë e si tek e fundit, duke përcjellë gjendje në të parën dhe vetë frutin në të dytin. Sa për gjendjen, ‘Portokallia’ gjen shprehi dhe tek thënia: “as mish e as peshk!”

As mish as peshk ishte një intervistë e dhënë nga Fatbardh Kadilli, një prej emrave të vonshëm në PD, pjesë e atij brezi që iu bashkua kësaj force në vitin 2005 kur erdhi në pushtet. Ka thënë diçka që për hir të së vërtetës duhet vlerësuar, se një pjesë politikanësh në PD e kanë mbyllur ciklin. Kjo është mëse e vërtetë dhe nuk vlen vetëm për PD. Edhe PS ka me shumicë prej atyre që çfarë kanë patur për për të dhënë në kaq vite, e kanë dhënë. Dhe nuk ka asnjë vlerë më vegjetimi i tyre politik, duke tentuar të mbahen sforcërisht gjallë dhe me oksigjenin e interesit dhelpërak mediatik, sidomos kur është puna për pak diversion për luftë mes llojit. Por Kadilli ka degjeneruar më pas në humor krizë, tipikisht në një gjendje të portokalltë kur tek këta politikanë cikëlmbyllur nuk ka përfshirë Berishën. Madje e ka mitizuar akoma më tepër. Kësaj i thonë t`i mbyllësh ciklin vetes, jo thjesht për karrierë politike, por për të menduar mirë dhe drejt, e nga ana tjetër të lësh hapur ciklin e “Portokallisë” në PD! / E.H.