Qeveria, ish-qeveria dhe një histori që mban erë

Nga Habjon Hasani

Në fillim nisi si gjeagjezë politike. Dilnin disa nga deputetët demokratë dhe pyesnin ministren Kodheli: Po çfarë di ti për trafikun e drogës? Më pas, debati plasi në Kuvend, Berisha përmendi Gjadrin, Divjakën dhe fshatrat e jugut ku uleshin avionë. Kur la Kuvendin, përpara se të hipte në makinë foli njëherë për gazetarët dhe u tha se të dhënat i kishte nga “Ipad”-i i tij. Me demek populli e mbante të informuar nëpërmjet Facebook-ut. Këto akuza u trajtuan me cinizëm nga përfaqësuesit e mazhorancës, kryeministri dhe kreu i kuvendit analogun me ironi avionët e denoncuar me mushkonjat. Pastaj erdhi faza tjetër, kur një dokument i SHISh që fliste për këtë çështje, pa dritën e diellit. Ky dokument u komentua aq shumë, deri kur vetë kreu i SHISH, i vuri kapak komenteve dhe deklaroi se ai ishte thjesht një informacion paraprak i pakonfirmuar. Por ndërsa të gjithë e quajtën një kapitull të mbyllur këtë ‘ëndrrën me avionë’, avioni na mbin në Divjakë.

Të shtunën loja ‘plasi’, ndërsa në dy ditët në vazhdim nisën të dilnin detajet, fillimisht që piloti ishte italian, që avioni kishte ngecur, i kishte dalë goma, por pak më tej, në pyllin e Divjakës ishte kapur dhe një shqiptar, emigrant prej vitesh në Itali, por që kishte vetëm 48 orë që kishte mbërritur në Shqipëri. Kishte braktisur fuoristradën e tij me 460 kg kanabis dhe hetuesve u deklaroi se kanabisin e kishte për ta ngarkuar tek avioni që kishte ngecur në rërë. Por raportohet se ai u ka deklaruar hetuesve edhe se frymëzimin e kishte marrë nga debatet në parlamentin shqiptar, se kishte tentuar njëherë ta sillte avionin në Gjadër por duke qenë se Gjadri është betonuar kishte zhvendosur planin në Divjakë. Më pas kishte blerë drogën në Krujë, me makinë e kishte çuar tek piloti italian të cilin po vetë e kishte kontaktuar dhe kishte bërë pazarin. Pra nga dëshmia e të arrestuarit shqiptar Saimir Bajrami rezulton se ai përveç pilotimit i ka kryer i vetëm të gjitha punët e tjera. Edhe organizatorin edhe korrierin edhe kontraktonin edhe pajtuesin e pilotit.

Në bazë të këtij deklarimi të Bajramit ka dy opsione logjike që shpjegojnë historinë e tij: Ose ai është një narkotrafikant i denjë për rekord “Gines”, duke sjellë një stil komplet të padëgjuar më parë ku një person bën punën e një rrjeti të tërë. Ose ai po gënjen. Nëse është varianti i parë i vërtetë, historia është spektakolare, një aventurë e organizuar nga një i papërgjegjshëm, që çoi çdo gjë në djall etj etj. Por zor…të dhënat flasin për një tjetër histori. Të dhënat përkrahin variantin e dytë, të një aksioni të organizuar, me qëllim dështimin.

Saimir Bajrami i ka deklaruar hetuesve se e kishte organizuar të gjithën vetë sepse  kishte nevojë emergjente për lekë. Por ama, ai deklaron se kishte kapacitete të mira për të blerë kanabisin. Ai e ka blerë në Krujë, me çmim 350 euro kg, që shkon diku një shpenzim prej afro 140 mijë eurosh. Nga ana tjetër 27 mijë euro i kishte në xhep në momentin që e kapën në pyll. Duket pak kontradiktore kjo pjesë, ai edhe justifikohet se kishte probleme me lekët dhe ishte detyruar të bënte trafik, por ama kishte kapacitete të plota për të organizuar skemën i vetëm, sikur të ishte një kapo trafiku. Epo o fukara, ose kapo trafiku, se të dyja bashkë sikur nuk shkojnë, apo jo?

Nga ana tjetër, në një intervistë ekskluzive për DITA-n, një narkotrafikant, i sprovuar në këtë biznes, u shpreh i bindur se roli i Saimir Bajramit ishte ai i një korrieri që e kishin futur në kurth. Si mundej të shkonte pikërisht një emigrant që kishte 2 ditë i ardhur në Shqipëri, të çonte ngarkesën nëpër rrugët labirint të Divjakës? Nuk gjendej dot dikush tjetër?

Shtuar kësaj, dje dolën në media dhe disa foto të bëra kështu si pa qëllim të keq, me disa çanta të fotografuara pranë avionit, por më pas doli dhe një video, ishin dy dashnorë anës detit në Divjakë, që kishin zënë sevda mes tyre nja 40 metra më tutje ku Sajmir Bajrami do çonte kanabisin dhe italiani do zbriste avionin. Garda mediatike pranë Berishës, nisi menjëherë interpretimet e fotove me çantat e zeza tek avioni si një provë se avioni kishte shkarkuar drogë por që ishte tërhequr fshehurazi.

Më pas gjërat u qartësuan dhe u pa se ishin policë ata që mbanin çantat dhe se çantat janë dorëzuar në prokurori dhe rezultonin me sende personale të pilotit italian. Nga ana tjetër një element shumë i dyshimtë është dhe vendi i uljes, përveç bujës së Divjakës javët e fundit, rëra dhe ai vend aty është një kurth i sigurt për çdo avion.

Nëse shikon vendin në Divjakë dhe gomat e një automjeti shkaktojnë thellësi në rërë rreth 10-20 cm dhe lënë gjurmë dhe një automjet e ka të vështirë të ecë. Avioni është i destinuar të ‘ngulet’ pa kushte dhe të ngecë  në një terren me rërë të atillë si në bregdetin e Divjakës. Hetimi mund të zbardhë detaje, deri më tani italiani ka mohuar gjithçka, ndërsa Bajrami ka marrë çdo gjë përsipër vetë. Historia mban shumë “erë” dhe e bukura është se zanatçinjtë e trafikut qeshin me të madhe kur shohin se si mbi një fabul që mban kaq erë, ish-qeveria, po ndërmerr aksione. Por ish-qeveria kontrollon sot Shërbimin Informativ, e një sërë institucionesh të tjera. Ka kapacitetin e plotë për të stisur operacione të tilla, me dështim të parashikuar të aksionit për trafikim, me qëllim arritjen e një përfitimi nga buja e skandalit më pas.

Problemi real është: Po qeveria me çfarë punon? E mbi të gjitha, si do punojë tani që  mushkonja ju bë avion? Si do punojë tani që kasta e pandëshkuar e PD-së është kthyer në moral-kërkuese dhe protestuese e indinjuar? Përgjigjet si rregull duhet t’i dinë të zotët e punës, të qeverisë, por e sigurt është që zgjidhja e këtij problemi nuk bëhet me foto ‘selfie’ në Facebook. Kaosi është një sfidë serioze që i është bërë qeverisë, është sfida që të bën grupimi i implikuar përballë, nëpërmjet strukturës së vet paramilitare.

***

Versioni i të arrestuarit Bajrami në hetuesi 

Sipas të arrestuarit Bajrami, gjithçka ka niur dy javë më parë në një takim në Vareza të Italisë, ku piloti Riformato merrte përsipër transportin e lëndës narkotike nga Shqipëria në Itali me avion. Më poshtë, versioni i tij i ngjarjeve, ku ka shumë pikëpyetje: “Pasi janë rënë dakord, Bajrami ka ardhur në Shqipëri ku ka gjetur lëndën narkotike në zonën e Fushë- Krujës. Me gjetjen e drogës, është njoftuar piloti për të ardhur në Shqipëri. Sipas dokumentacioneve të sekuestruar tek Aviacioni Civil, rezulton se me datë 5 maj piloti italian ka ateruar në Korfuz, nga andej ka kërkuar leje për të ardhur në Rinas, leje e cila është miratuar dhe më datë 8 në mëngjes ka ateruar në aeroportin e Rinasit, duke përcaktuar edhe koridorin e kthimit për në Pescara.

Mesditën e datës 8 maj, sipas Bajramit, piloti italian me shërbimin taxi të aeroportit ka ardhur në Tiranë, ku janë takuar me krutanin i cili e ka sistemuar në një hotel. Pasi kanë ngrënë drekë, e filmuar edhe nga kamerat e sigurisë së lokalit që tashmë janë sekuestruara ata janë larguar së bashku. Mëngjesin e datës 9 maj, Bajrami me makinën tashmë të bllokuar e ka marrë në hotel italianin dhe kanë zbarkuar në plazhin e Divjakës për të parë terenin ku do të zbrinin për të ngarkuar drogën. Pas inspektimit të zonës, italiani Riformato është kthyer në Hotel dhe me datë 10 maj ora 13:26 minuta italiani ka këkruar të largohet nga Rinasi, ku edhe i është krijuar koridoni ajror nga do të kalonte. Në fluturim e sipër, sipas dosjes së sekuestruar nga Aviavioni civil, rezulton se piloti Riformato ka kërkuar disa minuta kohë për të sodisur bregdetin shqiptar ku për disa çaste ka humbur nga radarët.

Bajrami thotë se rreth orës 14:30 minuta ishte në pritje të avionit, ku pas uljes në ecje e sipër për të ndaluar është këputur rrota e parë e avionit. Në atë moment, ai pretendon se ka tentuar të largohet por ka ngecur në rërë duke çarë sadokartin. Në nxitim e sipër, Bajrami thotë se është prishur edhe freksioni. Në atë moment, thotë ai kam kërkuar ndihmë për karrotrec dhe kam filluar të fsheh drogën.

Sipas hetuesve, dyshohet se kanë qenë dy makina dhe sasi e parë që ëshët gjetur e shpërndarë nëpër pyll ka qenë në pritje për ngarkim dhe ishte shkarkuar nga makina e cila është larguar me shpejtësi. Ndërsa për hetuesit makina që drejtonte Sajmir Bajrami ka ngecur. Në këtë moment piloti italian, sipas akuzës, ka hedhur telefonin së bashku me kartën në pyll dhe më pas ka pritur ardhjen e policisë, ndërsa Bajrami ka ngarkuar në karotrec makinën. Pasi është nisur për të dal nga rruga e plazhit të Divjakës, është ndaluar nga policia për kontroll ku janë gjetur sasia prej 100 kg hashash dhe shuma prej 27 mijë euro. Ndërsa pjesa tjetër prej rreth 200 kg hashash është gjetur e shpërndarë në disa vende, që në total sipas akuzës gjithsej janë sekuestruar rreth 300 kg hashash. Dyshohet se makinat që janë larguar kishin sasi tjetër droge, që i kanë shpëtuar edhe policisë. Ky rrëfik tashmë është pjesë e dosjes dhe pritet që në ditët në vazhdim të zbardhet versioni i tij.

Nga ana tjetër, sipas hetuesve, piloti italian nuk është regjistruar dhe kontrroluar nga policia shqiptare kur ka hyrë brenda territorit shqiptar dhe nuk është arritur të verifikohet nëse edhe raste tjera ky shtetas ka hyrë në Shqipëri. Prokuroria tashmë ka sekuestruar disa pamje filmike të regjistruara nga kamera të sigurisë, ku piloti italian dhe i arrestuari janë së bashku…”