KESH siguron rezerva të larta hidrike

Reshjet që kanë rinisur së fundmi kanë përmirësuar ndjeshëm situatën energjetike në vend, duke rritur nivelin e ujit në liqenet e hidrocentraleve më të mëdha. Sipas të dhënave nga KESH, niveli në liqenin e Fierzës është 289.2 metra ndërsa prurjet në 177 metër kub ujë në sekondë. Niveli në liqenet e Komanit dhe Vaut të Dejës është përkatësisht 171.2 dhe 74.3 metra, ndërsa prurjet anësore janë në vlerat e 140 dhe 261 metër kub ujë në sekondë. 15 milionë kilovatorë në ditë po prodhohen nga hidrocentralet e vendit dhe po në të njëjtat nivele është konsumi energjetik. Deri tani, në vend gjatë këtij viti janë prodhuar 6.2 terravatorë energji elektrike, ndërsa prurjet e shumta kanë rritur edhe rezervën hidrike në lumin Drin. Kështu nevoja për import gjatë muajve të nxehtë të stinës së Verës do të jetë e ulët dhe parashikohet që vetëm CEZ të kryejë operacione të tilla për të mbuluar humbjet në rrjet. Ndërkohë, Korporata është duke eksportuar 3 milionë kilovatorë në ditë drejt Kosovës. Mungesa e linjës së interkonjeksionit vazhdon të penalizojë shkëmbimet energjetike mes dy vendeve dhe të sjellë kosto më të larta për blerjen e energjisë. Duket se, dy vendet do të rrisin shkëmbimet energjetike vetëm nga fundi i vitit 2015, kohë kur pritet të ketë përfunduar ndërtimi i linjës së interkokensionit 400 kv.