Z.Rama ti duhet të ikësh

“Qytetarët shqiptarë janë gati të ngrihen dhe të luftojnë pa kursyer asgjë për lirinë dhe sovranitetin”. Lulëzim Basha

Z. Rama,

A e keni lexuar thënien e mësipërme të L.Bashës? Nuk e dini kush është ai dhe çfarë thotë? Turp për ju!

Ai flet në emër të qytetarëve, pa i pyetur ata. Ai flet edhe në emër të një milion qytetarëve që, diçka më pak se një vit më parë, me përçmimin më të madh, ia hoqën të drejtën morale për të qeverisur shqiptarët. Jo vetëm atij, por edhe Atit të tij shpirtëror. Madje, kryesisht, këtij të dytit. Ai nuk flet në emër të votuesve të vet, sepse, po të ishte për ata, ti nuk do të kishe nevojë për të ikur. Thjeshtë dhe vetëm sepse nuk do të kishe mundur të shkoje aty ku je.

Ai thotë se qytetarët (e tij) shqiptarë janë gati (u mjafton një lëvizje e gishtit të tij) të luftojnë. Vini re: të luftojnë. Me çfarë? Kundër kujt? Jo vetëm kaq. Basha (nënkupto Berisha) thotë se ata (qytetarët shqiptarë ) nuk do të kursejnë asgjë (këtu përfshihet edhe jeta e tyre) për lirinë dhe sovranitetin. E ka fjalën për lirinë që iu pati siguruar ai më 21 janar 2011 dhe për sovranitetin që ua pati ngritur lart në vitin 2010 kur nënshkroi Marrëveshjen Antikombëtare të Detit me Greqinë. Madje, ai duket se e ka fjalën edhe për sovranitetin që ua pati konsideruar kur i dha “gabimisht” kompanisë Bechtel nja 230 milion euro. Është fjala për eurot e popullit, eurot e qytetarëve që ka thirrur në protestë.

Unë, personalisht, shoh shumë arsye që ti, z. Rama, të ikësh sa më parë. A e dini pse?

Sepse ti dhe qeveria jote, tash tetë muaj, keni vazhduar të prishni ndërtimet pa leje, të kundërligjshme, dhe njerëzit tani druhen të ndërtojnë pa leje, ashtu siç bënin kur vendin e sundonte kompania politike 2B. Ju keni bërë vazhdimisht gabime, duke kapur ata që trafikojnë  drogën e mbjellë pranverën e kaluar në Lazarat dhe gjetkë. Fajin më të madh e keni bërë duke betonuar pistën ajrore të Gjadrit, duke mos iu dhënë mundësi transportuesve zemërmirë të drogës ta përdorin si pikë ngarkimi. Nuk ju mjaftoi kjo dhe ua dogjët edhe rrugën tjetër nëpërmjet bregdetit. Një qeveri që merr këto masa, patjetër duhet të jetë e lidhur me trafikantët. Po të mos ishit të lidhur me ta, ju do i linit të qetë të bënin punën e tyre, siç e kanë bërë tash tetë vjet.

Ti duhet të ikësh sa më parë, në mënyrë që, në pushtet të rikthehet Bosi i Kontrabandës së Naftës, që, siç e ka pranuar vetë, ua jepte serbëve për t’iu bërë mirë kosovarëve, si dhe i Kontrabandës së Armëve, që, gjithashtu, u detyrua ta pranonte, por e quajti të ligjshme.

Ti duhet të ikësh sepse këtë ta kërkojnë ata që vranë katër qytetarë të pafajshëm dhe u betuan se do vrisnin shumë herë më tepër po t’ua donte puna. Ata nuk e dhanë dorëheqjen, sepse nuk kishin arsye ta bënin këtë. Ti duhet të largohesh sepse avionin e kontrabandës së drogës nuk e rrëzove ti, por u rrëzua vetë, ndërsa policia jote e dërgoi pilotin me shokë në burg. Këtë largim, me të drejtë, ta kërkojnë ata që patën rrëzuar në Gërdec nja 1500 shtëpi, vranë 26 shtetas dhe plagosën 300 të tjerë, në përpjekje për “të bo noj lek” me municionet e diktaturës. Ai që kishte miratuar ngritjen e fabrikës së vdekjes në qendër të banuar nuk i gjeti vetes asnjë faj dhe përgjegjësi. Është ai që pati rrahur e burgosur dikur gazetarë (madje, edhe ty), politikanë kundërshtarë dhe që i vuri zjarrin redaksi së një gazete. Ai quhet Sali Ramë Berisha dhe ka qenë Komandanti i Fushatës për dhunimin e zgjedhjeve të 26 majit 1996 si dhe trukimin (emërtim i diplomacisë amerikane) e zgjedhjeve të vitit 2009. Ai pati tentuar edhe të përdorte artilerinë, aviacionin dhe LHL kundër popullit të vet.

Mirëpo, të gjitha këto, ai beson se kishte të drejtë t’i bënte. Pikërisht, për të ruajtur lirinë e sovranit Sali, që ky të vazhdojë të bëjë ato që ka dhënë prova se di t’i bëjë, Lulzim Basha u bën thirrje qytetarëve shqiptarë “të ngrihen dhe të luftojnë pa kursyer”. Ndërsa ti, që nuk ke bërë asnjërën nga këto, duhet të zhdukesh sa më parë për ta lënë të lirë bandën e vrasësve plaçkitës që jo vetëm të gëzojë pasuritë e grabitura, por edhe të rikthehen në pushtet nën avazin: “O Sali t’u bëfsha ferrë/ merr pushtetin dhe një herë”.

Ata që të kërkojnë të ikësh kanë të drejtë sepse, po të rrish gjatë aty ku je, atyre do të mund t’iu vijë dita të thirren në prokurori apo gjykata për veprat kobzeza që kanë kryer. Kjo gjë do të mund t’ua prishte humorin. Prandaj, në vend që të jenë pas hekurave duke iu kërkuar leje gardianëve për të përdorur WC, ata kanë zgjedhur të kërkojnë dorëheqjen tënde. Për këtë nuk mund të fajësohen assesi. Është i vështirë burgu, sidomos kur je plak. Aq më tepër kur je i sëmurë mendërisht. Ruana, o Zot!

Z. Rama! Ti duhet të largohesh edhe për një arsye tjetër madhore. Po të vazhdosh të rrish aty ekziston mundësia që Bashkimi “Komunist” Evropian të na pranojë si vend kandidat për anëtarësim. Kjo gjë s’duhet të ndodhë, sepse do të ulte poshtë autoritetin e Atij që shtypi londinez i marsit 1997 e quante “Regjimi Gangster” ndërsa në vitin 2004 një gjykatë në Zvicër e quante “klika e Sali Berishës” (sipas dokumentit të botuar nga shtypi i Tiranës). Neve na duhet i tillë regjim sepse vetëm kështu mund të bëjmë “progres”. Prandaj, edhe Ai kërkon të mbjellë kaos dhe të bëjë me vepra ato që s’guxon t’i thotë me gojë.

Para pak kohësh, kompania 2B, themeluar vetëm me kapitalin e njërës B, të pati kërkuar largimin nga detyra të Kryepolicit shqiptar sepse para 15 vitesh kishte drejtuar operacionin ku mbeti i vrarë një individ që kishte marrë peng një autobus me 30 pasagjerë në Greqi dhe marrëzinë e tij terrorizuese, të demonstruar për qindra kilometra, donte ta demonstronte edhe në bulevardet e Tiranës. Pengmarrësit, në të gjithë botën, arrestohen ose asgjësohen. Mirëpo, me këtë fakt nuk mund të pajtohet ai që, prej 24 vjetësh, ka marrë peng gjithë Shqipërinë me mbi tre milion banorë. Ai, i cili e ka shumë të lehtë dhe të dobishme të jetojë pa nder, pa moral, pa dinjitet, pa skrupuj, por e ka të pamundur të jetojë pa pushtet, pa sundim dhe, rrjedhimisht, pa përfitime prej tyre.

Prandaj, ti duhet të largohesh sepse, ndërsa pengmarrësi i 30 vetëve e mori ndëshkimin, pengmarrësi i tre milion shqiptarëve duhet të bredh i lirë, pa kurrfarë ndëshkimi. Ti duhet të largohesh pa e prekur sistemin e Drejtësisë, për të cilin Ai, qysh në fillimet e viteve ’90 e deri më tani, ka derdhur shumë mund për ta korruptuar deri në atë shkallë sa, bashkë me Lulin, nxënësin dhe birin e tij shpirtëror, ngazëllehen nga përtallja që u bëjnë viktimave të vrarë me urdhër të tyre.

Por, dëgjo mirë: Mos u largo pa na e hequr qafe pengmarrësin e Shqipërisë! Përndryshe, do të të mallkojnë shqiptarët gjithë jetën.