SHËNIM: “Avioni”, për një Divjakë të së nesërmes

Jeta njerëzore është shoqëruar gjithnjë me trille fatesh e fatalitetesh nga më të ndryshmet, duke bërë që për një rastësi, të ndryshojë  katërcipërisht jeta e dikujt, e ndonjë njeriu të vetëm apo e ndonjë grupi njerëzish. Ne si shqiptarë kurrë nuk kemi ditur të shfrytëzojmë maksimalisht resurset tona, humane apo natyrore qofshin ata. Dhe nuk na mbetet veçse të tregohemi të mencur në shfrytëzimin e  çmendurive tona, të atyre lloj paradokseve me te cilat mbushet jeta jonë çdo ditë.

Dhe pa dyshim që avioni i rënë në plazhin e Divjakës, mund të jetë një pikë kthese në fatet e banorëve të kësaj zone. Në reportazhin e një të përditshmeje, thuhet se banorët  e bizneset afër vendit të rënies së avionit, kërkojnë që shteti të mos e lëviz atë relike që aty, por t`i japë një vlerë muzeale në funksion të turizmit. Sipas tyre, kjo është e dukshme, pasi vizitueshmëria e plazhit këto ditë ka qenë mjaft e madhe dhe e pazakontë.  

Divjaka nuk është një vend i humbur i Shqipërisë. Përkundrazi, është ndër më të njohurat dhe për shumë faktorë. Dhe këto ditë, historisë së saj i është shtuar dhe një eveniment që mund të konsiderohet i vyer nëse menaxhohet me mençuri. Nuk ka vend për ironi. Shembujt nga bota janë të panumërt se si një  ndodhi fare të vockël e kanë kapitalizuar mjeshtërisht në funksion të turizmit dhe rigjallërimit social të një zone të caktuar. Divjaka ka det, ka pyll, ka resursve natyrore të jashtëzakonshme me florë dhe faunë. Por tashmë ka dhe një avion droge në truallin e saj, që mund ta fusë fare mirë në pikat më të vizitueshme të Shqipërisë.                                                                                                            

Nuk duhet t`ja lejojmë vetes që të jemi një vend ku çdo e keqe e ka një të…keqe! Duhet të bëjmë ç`mos që pas çdo të keqeje, të na vjen një e mirë!      / E.H.