SHËNIM: Greva e urisë, ky kingllëk radhe!

Sa për parantezë, preferohet që me kingllëk të emërtohet çdo sjellje politike që ka në thelb gënjeshtrën, hipokrizinë dhe trushkulitësinë; e ardhur kjo pas cilësimit gjysëm shoqëror e gjysëm bulevardesk që ministri Veliaj i bëri një zonje që hiqej si fatkeqja e shekullit për shkak se e kishin larguar padrejtësisht nga puna ndërkohë që ishte e diplomuar për inxhinieri. Pak orë me vona, zonja në fjalë rezultoi që nuk ishte as inxhiniere e as me arsim të lartë, por thjesht një militante e thekur e PD-së.

Më kinge pra nuk kish si bëhej. Dhe ky lloj kingllëku, është shfaqur orët e fundit si një operacion ofensiv politik nga ana e PD-së, duke hedhur në vijën e parë të frontit të shkarkuarit nga puna. Ata që vetëkonsiderohen si viktima të shkarkimeve të padrejta, do ishin shumë më dinjitozë e të vërtetë në përpjekjet e tyre, edhe në sakrificën e tyre, nëse do mbanin distancë nga politika. Madje dhe PD do tregohej më inteligjente nëse do e bënte vetë këtë gjë. Mirëpo, mungesa e moralit në çdo aksion politik të demokratëve është aq e madhe, sa vetëvetiu derivojnë në sjellje të trasha, deri dhe qesharake dhe absurde.                                                                                                                                      

Në Shqipëri, çdokush mund të gjejë arsye për të ndërmarrë një grevë urie. Ndaj nuk ka qenë çudi që përgjatë 20 viteve, në kohë të ndryshme janë zhvilluar paralel deri në 10 greva urie në cepa të ndryshëm të vendit dhe për arsye nga më të ndryshmet. As në këtë pikë nuk kemi të ngjashëm në rajon e më gjërë. Por kjo e fundit, e investuar qartësisht dhe fort politikisht, përbën kulmin e abuzimit me një të drejtë. Jo se nuk mund të kenë të drejtë të ngujuarit, por se të drejtën e kanë bërë aq pis, saqë e meritojnë një kundërgrevë urie mu përballë, nga të shkarkuarit prej PD-së më 2005-ën e e Lulzim Bashës më 2011-ën. / E.H.